Լաուրա Սարգսյան, Sputnik.
Հայտնի երգիչ, բանաստեղծ ու կոմպոզիտոր Բուլատ Օկուջավան ծնվել է 1924 թվականին, կուսակցական գործիչ, ազգությամբ վրացի Շալվա Ստեփանի Օկուջավայի և Աշխեն Նալբանդյանի ընտանիքում, որը հայտնի հայ բանաստեղծ Վահան Տերյանի զարմուհին էր: Բուլատը 13 տարեկան էր, երբ ծնողներին ձերբակալեցին. հորը սպանեցին, իսկ մորն աքսորեցին:
«Բուլատը չէր սիրում խոսել այդ օրերի մասին, քանի որ նա մոր հետ էր պատիժը կրում, և երբ մենք հանդիպում էինք, աշխատում էինք միայն լավ բաներից խոսել», — Sputnik Արմենիայի թղթակցի հետ զրույցում ասաց Բուլատի ազգականը՝ Արամ Գրիգորյանը:
Գրիգորյանը նույնպես Վահան Տերյանի ազգականներից է: Նրա խոսքով՝ Բուլատի կյանքի իրադարձություններն անդրադարձել են ինչպես պոետի կյանքի, այնպես էլ ճակատագրի վրա: Հալածանքները, անհաջողություններն ու ժողովրդի թշնամու պիտակն իրենց հետքն են թողել: Բուլատը շատ մտերիմ էր Թբիլիսիում բնակվող մորաքույրների հետ ու անչափ սիրում էր այդ քաղաքը:
«Բուլատի հետ ծանոթացել եմ 1960-70-ականներին: Մի անգամ մոտեցա նրան, խփեցի ուսին և ասացի՝ չասես, որ մենք բարեկամներ չենք: Այսօրվա պես հիշում եմ նրա զարմանքն ու հուզված դեմքը»,- հիշում է Գրիգորյանը:
Գրիգորյանն ու Օկուջավան մտերմացան, ու թեև հաճախ չէին հանդիպում, բայց և այնպես ջերմ հարաբերություններ էին պահպանում:
«Ես Բուլատին մինչ այդ հանդիպումն էլ էի ճանաչում, այսպես ասած, նրա երկրպագուն էի, հպարտանում էի նրանով: Օկուջավան շշմեցնող անձնավորություն էր, որի հետ կարելի էր զրուցել գրեթե ամեն ինչի մասին», — պատմում է Գրիգորյանը:
Հայտնի երգչի շուրջ տարատեսակ լեգենդներ էին հյուսվում. ասում էին, որ նա բարդ հարաբերություններ ունի մոր հետ, թշնամական հարաբերություններ՝ Վլադիմիր Վիսոցկու հետ:
«Բուլատը պաշտում էր մորը, իսկ Վիսոցկու հետ նրանք լավ հարաբերություններ ունեին, հարգում էին միմյանց»,- վստահեցրեց Գրիգորյանը՝ ավելացնելով, որ երգչին շատ հարցերում օգնում էր ինտերնացիոնալ լինելը:
Նա իրեն կիսով չափ հայ էր զգում և հպարտանում էր Տերյանի հետ ունեցած ազգակցական կապով, թեև Հայաստանում միայն մեկ անգամ էր եղել:
«Գերադասում էր թեյի փոխարեն սուրճ խմել և անսահման աշխատասեր էր: Մի անգամ կեսգիշերին ես ու Բուլատը նստած էինք Գրականագետների տան դատարկ բուֆետում, Բուլատը սուրճը խմեց, ինչ-որ կարկանդակներ վերցրեց ու գնաց տուն աշխատելու»,- պատմեց Գրիգորյանը:
Բուլատն իր արվեստով բազմաթիվ սրտեր է գերել ու բազում հոգիներ ցնցել: Հայտնի բանաստեղծ Եվգենի Եվտուշենկոն մի առիթով գրել էր նրա մասին. «Երբ երեկոյան զբոսնում ես Մոսկվայում, բոլոր բաց պատուհաններից Բուլատ Օկուջավայի երգերն են հնչում»:
Այսօր կլրանար Օկուջավայի 92-ամյակը:
