ԵՐԵՎԱՆ, 12 հունիսի — Sputnik. Բանակում առաջացած խնդիրների շուրջ քարոզչական տեսահոլովակների տեսքով հասարակությանը հասցեագրված կոչերը, հորդորներն աշխարհում ընդունված պրակտիկա են, մեկնաբանելով ՊՆ-ի տարածած քարոզչական տեսահոլովակները` ասաց ՀՀ պաշտպանության նախարարի մամուլի քարտուղար Արծրուն Հովհաննիսյանը: Այդուհանդերձ, այդ հոլովակներից հետո էլ, նրա խոսքով, գաղտնիություն պարունակող հարցերի, ասեկոսեների քննարկումը շարունակվում է:
«Գլոբալ առումով դրական տեղաշարժ կա, բայց միևնույն ժամանակ նաև որոշակի ոչ մեծ լսարան վայելող հարթակներում կա նաև տրամագծորեն հակառակ միտումներ ունեցող հարցադրումների քանակի ավելացում, այսինքն` անառողջ քննարկումների մղում, ինչը մի կողմից ընկալելի է, որովհետև էմոցիոնալ դաշտը պատերազմից հետո խորացել է, մյուս կողմից` դեռևս ընկալման պակաս կա, որ այս պահին ամեն ինչ չէ, որ անցել է, վտանգավոր փուլ է, և դեռ պետք է որոշ բաներ չբացել, չհրապարակել»,- ասաց Արծրուն Հովհաննիսյանը` ավելացնելով, որ չթաքցնելու, թափանցիկության լոզունգի տակ անթույլատրելի բաներ անելու միտում է նկատվում:
