ԵՐԵՎԱՆ, 11 հունիսի-Sputnik. Գերմանիայի ԱԳՆ-ն թուրքական արմատներով պատգամավորներին գաղտնի խորհուրդ է տվել առայժմ չմեկնել Թուրքիա, հաղորդում է ՌԻԱ Նովոստին՝ հղում անելով Spiegel Online հրատարակությանը:
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
Թերթը գրում է, որ պատգամավորներին խորհուրդ է տրվել խուսափել ուղևորություններից՝ անվտանգության նկատառումներից ելնելով:
Բացի այդ, հաղորդվում է, որ մի շարք գերմանացի պատգամավորներ, որոնք ծնունդով Թուրքիայից են, արդեն հրաժարվել են Թուրքիայում նախատեսված գործուղումներից և արձակուրդից:
Պատգամավորներից մեկն էլ Թուրքիայում բնակվող ծնողներին խնդրել է մեկնել այլ երկիր:
Բունդեսթագի ընդունած բանաձևից հետո թուրքական ծագում ունեցող պատգամավորների հասցեին սկսել են սպառնալիքներ ու վիրավորանքներ հնչել, ընդ որում՝ նաև Անկարայի պաշտոնական անձանցից:
