ԵՐԵՎԱՆ, 11 հունիսի — Sputnik. Տիգրան Բալայանը գրառում է արել Գարեգին Նժդեհի արձանի տեղադրման կապակցությամբ Ֆեյսբուք սոցիալական ցանցի իր էջում՝ անդրադառնալով Երևանում Գարեգին Նժդեհի արձանի տեղադրման հետ կապված ադրբեջանական արձագանքներին:
«Բոլորին հայտնի է, որ Հայաստանում Նժդեհի անունով հրապարակներ, փողոցներ, մետրոյի կայարան կա, ինչպես նաև թուրքական զավթիչների դեմ հերոսական պայքար մղած Գարեգին Նժդեհի հիշատակը հավերժացնող բազմաթիվ արձաններ կան»,- հիշեցրել է Բալայանը:
Նրա խոսքով՝ այս արձանները տեղադրված են նրա համար, որ Առաջին Հանրապետության ժամանակաշրջանում Նժդեհը երկրի բնակչությունը պաշտպանեց այդ տարիներին առաջին անգամ աշխարհի քարտեզի վրա ի հայտ եկած Ադրբեջան պետության զինված խմբավորումների ոտնձգություններից, ինչպես նաև կազմակերպեց Հայաստանի ու Լեռնահայաստանի` Զանգեզուրի պաշտպանությունը:
«Եվ անհասկանալի ոչինչ չկա, թե ինչու է Ադրբեջանում Նժդեհի արձանի տեղադրումը պատվիրված հոդվածների հերթական փոթորիկ առաջացնում, որն ուղղակի հետևանքն է Ադրբեջանի ղեկավարի` Հայաստանի Հանրապետության տարածքների նկատմամբ բարձրաձայնած հավակնությունների: Անբարո ու անարդյունավետ եմ համարում ֆաշիզմի դեմ պայքարում հայ ժողովրդի անգնահատելի ավանդի վրա ստվեր գցելու Բաքվի ջանքերը»,- գրել է Բալայանը:
Նախօրեին Հայ ազգային հերոս Գարեգին Նժդեհի արձանին էր անդրադարձել նաև ՌԴ ԱԳՆ ներկայացուցիչ Մարիա Զախարովան՝ նշելով, որ Մոսկվային զարմացրել է Երևանում` Վերմախտի «Հայկական լեգեոնի» գեներալ Գարեգին Նժդեհի արձանի տեղադրումը։
