ԵՐԵՎԱՆ, 11 հունիսի — Sputnik. Peace of Art կազմակերպությունն ամերիկյան Մասաչուսեթս նահանգի Ֆոքսբորո քաղաքում Հայոց ցեղասպանությունը ճանաչելու համար Գերմանիային ուղղված շնորհակալությամբ պաստառ է տեղադրել: Այս մասին հայտնում է Armenian Weekly-ն:
Պաստառի վրա գրված է. «Ճշմարտությունն ընդդեմ ազգային շահի»:
Peace of Art-ի ղեկավար Դանիել Վարուժան Խեջինյանը հայտնել է, որ հայերը երախտագիտություն են հայտնում Գերմանիային՝ Հայոց ցեղասպանությունը ճանաչելու համար: Նրանք նաև կոչ են անում ԱՄՆ-ին հետևել Գերմանիայի օրինակին՝ հանուն ճշմարտության մի կողմ թողնելով տնտեսական շահերը:
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
