Նելլի Դանիելյան, Sputnik.
Արագածոտնի մարզի Բյուրական գյուղի բազմաթիվ տեսարժան վայրերին ավելացել է ևս մեկը` վարպետ Գուրգենի դարբնոցը։ Գուրգեն Փիլիպոսյանն այն բացել է 28 տարի առաջ, բայց դրանով հետաքրքրվողները եղել են միայն կենցաղային իրեր պատվիրող համագյուղացիները։
Հիմա արդեն վարպետ Գուրգենն այցելուների պակաս չունի։ Բյուրական այցելող զբոսաշրջիկներն, իմանալով, որ գյուղում դարբին կա, ցանկություն են հայտնում տեսնելու նաև նրա աշխատանքը։ Իրեն գործից կտրողներին դարբինը մեծ սիրով է ընդունում, անգամ թույլ է տալիս վերցնել աշակերտի մուրճն ու փորձել կռել շիկացած երկաթը։ Դարբնի աշակերտն աշխատում է մեծ մուրճով, վարպետը` փոքրով, որով միայն ցույց է տալիս, թե որտեղ պետք է հարվածի աշակերտը։
Երկաթը տաք-տաք ծեծելու հաճույքն զգալու գայթակղությանը չդիմացա նաև ես, և մի քանի րոպեով լրագրողի գրչի փոխարեն ձեռքս առա դարբնի ծանր մուրճը։
