ԵՐԵՎԱՆ, 10 հունիսի – Sputnik. Հայաստանում օտարերկրյա ներդրումների ծավալն այս տարի կտրուկ նվազել է։ Եթե անցյալ տարվա առաջին եռամսյակում 60 մլրդ դրամի ներդրում էր կատարվել, ապա այս տարի` միայն 1.7 միլիարդի։ Բայց նույնիսկ այս ներդրումները Հայաստանում չեն մնացել, այլ հոսել են դուրս։ Նման պատկեր է արձանագրել տնտեսագետ Վիլեն Խաչատրյանը` ուսումնասիրելով այս տարվա տնտեսական ցուցանիշները։
Օրինակ, Կիպրոսն, այս տվյալներով, 2016թ.-ի առաջին եռամսյակում Կիպրոսից Հայաստան «եկած» ներդրումները 7.7 մլրդ դրամով քիչ են, քան հակառակ ուղղությամբ։
«Ստացվում է` մենք Կիպրոսում ավելի շատ ներդրում ենք արել, մեզանից տարել են այդ գումարները, քան Կիպրոսը` մեր երկրում։ Սա նշանակում է գումարների հետ վերադարձ, դրա համար էլ ներդրումները նվազել են։ Նման իրավիճակ ունենք Ֆրանսիայի, Լյուքսեմբուրգի հետ»,- ասում է տնտեսագետն ու ավելացնում` նշանակում է, որ Հայաստանից գումարները հետ են գնում այն երկրներ, որտեղից ժամանակին ներդրումներ են արել Հայաստանում։
Այս տարի Հայաստանում նվազել են նաև ներծումները։ Իսկ ներմուծվող ապրանքների կրճատումը, Վիլեն Խաչատրյանի համոզմամբ, լավ կյանքից չէ։
«Եթե ամբողջ տարվա ընթացքում ներմուծումը կրճատվել է 1 մլրդ 172 մլն դոլարով, ու դեռ շարունակվում է կրճատվել, նշանակում է, որ մենք նախորդ տարվա համեմատ ավելի վատ ենք ապրում, անցյալ տարվա համեմատ ավելի քիչ գնողունակ ենք»,- ասում է նա։
Փոխարենը ինտենսիվ կերպով աճում է պետական պարտքը` յուրաքանչյուր ամիս կայուն կերպով ավելանալով 40-50 մլն ԱՄՆ դոլարով։
Բայց կան նաև դրական ցուցանիշներ, օրինակ` տնտեսական ակտիվությունն այս տարվա առաջին ամիսներին կազմել է 106%, արդյունաբերական արտադրանքի ծավալը`110%, գյուղատնտեսական համախառն արտադրանքը` 104.1%։
Բայց այս ցուցանիշները տնտեսագետին այնքան էլ չեն ոգևորում։ Նրա որակմամբ` դրանք «նախընտրական մակրոտնտեսական ցուցանիշներ են»։
«Ներդրումները կրճատվում են, շինարարությունը կրճատվում է, բայց մենք ունենք 106 % տնտեսական աճ, ես դա անվանում եմ «նախընտրական մակրոտնտեսական ցուցանիշներ»,- ասում է տնտեսագետը` ավելացնելով, որ այս ցուցանիշներն են դառնալու հաջորդ տարի նախանշված նախընտրական քարոզչության բազան։
