ԵՐԵՎԱՆ, 10 հունիսի — Sputnik. Հայաստանի դեղերը կարող են ղազախական շուկա մուտք գործել` առանց նախնական գրանցման։ «2014թ.-ի դեկտեմբերի 23-ին ԵՏՄ շրջանակում դեղամիջոցների շրջանառության միասնական կանոնների և սկզբունքների մասին համաձայնագրին Հայաստանի միանալու մասին արձանագրության վավերացման մասին» օրենքի համապատասխան օրինագիծն այսօր քննարկել է Ղազախստանի խորհրդարանի սենատի սոցիալ-տնտեսական զարգացման և գիտության հարցերի հանձնաժողովն ընդլայնված նիստի ընթացքում։
Ինչպես նշվել է նիստի ընթացքում, այդ փաստաթուղթն ընդունելիս Հայաստանի Հանրապետության դեղամիջոցները կարող են առանց նախնական գրանցման ներկրվել ղազախական շուկա։
«Այսօր Ղազախստանի խորհրդարանի սենատում քննարկվել է բժշկական նշանակության իրերի և դեղամիջոցների ընդհանուր միասնական պահանջների մասին ԵՏՄ-ի համաձայնագրին Հայաստանի միանալու արձանագրության վավերացման մասին օրինագիծը»,- նիստի ընթացքում ասաց Ղազախստանի առողջապահության և սոցիալական զարգացման փոխնախարար Ելժան Բիրտանովը։
Նրա խոսքով` խոսքը դեղամիջոցների միասնական գրանցման մասին է։ «Այսինքն, դեղը գրանցելով ԵՏՄ անդամ երկրներից մեկում` անհրաժեշտություն չկա դրանք գրանցել այլ երկրներում։ Դրանով հանդերձ նվազում է արտադրողների և բիզնեսի ծանրաբեռնվածությունը, ժամկետները կրճատվում են, ինչպես նաև մեծ հասանելիություն է հայտնվում ԵՏՄ քաղաքացիների համար»,- պարզաբանեց նա։
Միաժամանակ Բիրտանովը պարզաբանեց, որ ցանկում ներառվում են տեսչությանը ներկայացված պահանջները` դեղամիջոցների որակի ապահովման վերաբերյալ, ինչպես նաև կլինիկական փորձարկումների արդյունքների ընդհանուր ճանաչումը։
«Մենք կարծում ենք, որ սա ԵՏՄ քաղաքացիներին ավելի որակյալ և մատչելի միջոցներ ստանալու հնարավորություն է տալիս»,- ասաց գերատեսչության փոխնախարարը։
