ԵՐԵՎԱՆ, 10 հունիսի-Sputnik. Ռուս դերասանուհի Եկատերինա Գուսևայի համերգը, ով հայ հանդիսատեսին հայտնի է թատրոնում և կինոյում բազմաթիվ դերերով, նվիրված էր Ռուսաստանի օրվան։
Գուսևայի ելույթը սկսվեց լեգենդար ֆրանսահայ շանսոնիե Շառլ Ազնավուրի երաժշտությամբ։ Երգող դերասանուհին շարունակեց իր համերգի հայկական գիծը` կատարելով «Դու շտապիր, շտապիր ինձ մոտ» ստեղծագործությունը, որի երաժշտության հեղինակը հայտնի կոմպոզիտոր Առնո Բաբաջանյանն է, խոսքերինը` բանաստեղծ Եվգենի Եվտուշենկոն։ Գուսևան կատարեց նաև ռոմանսներ և երգեր ֆիլմերից։
Դերասանուհին առաջին անգամ էր Հայաստանում և խոստովանեց, որ տվյալ պահին հասցրել է ծանոթանալ միայն հայկական խոհանոցին, որն իրեն շատ է դուր եկել։ Միաժամանակ նա հույս հայտնեց, որ կհասցնի տեսնել Երևանի գեղեցկությունը և տեսարժան վայրերը։
Համերգին ներկա էին Հայաստանի առաջին տիկին Ռիտա Սարգսյանը, Հայաստանում Ռուսաստանի դեսպանատան ներկայացուցիչներ` արտակարգ և լիազոր դեսպան Իվան Վոլինիկինի հետ, մշակույթի և արվեստի գործիչներ, երաժշտասերներ։
