ԵՐԵՎԱՆ, 10 մայիսի-Sputnik. Լեռնային Ղարաբաղի հակամարտության կարգավորումը երկարատև ընթացք է պահանջում, լրագրողների հետ հանդիպման ժամանակ կարծիք հայտնեց` «Ընդդեմ իրավական կամայականության» հ/կ գործադիր տնօրեն Լարիսա Ալավերդյանը։
Հիշեցնելով նախօրեին կառավարության նիստից հետո Շավարշ Քոչարյանի արտահայտությունը, թե «Ալիևի ստերն անվերջ են ու հավերժ», Sputnik Արմենիան հարց ուղղեց Ալավերդյանին` արդյո՞ք այս իրավիճակում հնարավոր է երկխոսությունը։
«Եթե երկխոսություն ասելով դուք հասկանում եք ինչ-որ մի պտուղ ստանալու առումով արդյունավետ քաղաքական պրոցես, ապա ասեմ` այո, անարդյունավետ է, բայց բուն հանդիպումները, ֆիզիկական արարողությունը կարևորագույն տեղ է գրավում Մինսկի խմբի համանախահների օրակարգում։ Միաժամանակ դրանք փոքրիկ քայլեր են։ Ոչ պատերազմ, ոչ խաղաղություն հեղհեղուկ վիճակը դեռ շարունակվում է, տեղաշարժ այս պահին չկա»,-ասաց Ալավերդյանը։
Նա Հայաստանի քաղաքական վերնախավին կոչ արեց լրջորեն վերաբերվել հարևան պետությունների` Ադրբեջանի և Թուրքիայի հակահայկական քաղաքականությանը և դա չանվանել պարզապես «տղայություն»։ Նրա խոսքով` մենք ունենք հարևան, որը չի թաքցնում իր քաղաքական հայացքները Հայաստանի վերաբերյալ։
«Խոսքն ավելի լուրջ իրավիճակի մասին է։ Դա վաղուց մշակված հետևողական քաղաքականություն է, պետք է հստակեցնենք, որ Թուրքիայի պես կա ևս մեկ պետություն, որ չի հանդուրժում մեր ներկայությունը քարտեզի վրա»,-ասաց նա։
Ալավերդյանն Ալիևին չի դիտարկում որպես Ադրբեջանում եզակի անձ, ով հակահայկական պայքար է մղում։ Ավելին, նա Ադրբեջանի քաղաքական դաշտում չի տեսնում այնպիսի ուժեր, որոնք իշխանության գալով` կփոխեն կարծրացած դիրքորոշումները։
Ինչ վերաբերում է ԵԱՀԿ Մինսկի խմբի գործունեությանն ու այս ու այն կողմից հնչող տեսակետներին, թե նրանք կառուցողական քայլեր չեն իրականացնում, Ալավերդյանն ասաց, որ խնդիրն առաջին հերթին «մեր մեջ է»։ Ըստ նրա` Հայաստանը պետք է մղի նրանց կոնկրետ գործողությունների։
«Մենք միշտ սպասում ենք, որ ավելի ակտիվ քայլեր անեն մյուսները։ Որտե՞ղ ենք մենք օգտվել տվյալ պահից, պատմական, միջազգային իրավունքից։ Շատերն ասում են, որ ԵԱՀԿ Մինսկի խմբի համանախագահները չլուծեցին այն խնդիրները, որոնց մասին բարձրաձայնում էին։ Հենց մենք պետք է մղենք Մինսկի խմբի համանախագահների ինստիտուտը դեպի բանակցային գործընթացներ»,-ասաց Ալավերդյանը։
Նախկին օմբուդսմենը հիշեցրեց, որ համանախագահները Լեռնային Ղարաբաղի հակամարտության մասին ավելի քան իրազեկված են ու հստակ գիտեն, թե ով է նախահարձակ կողմը։
Վերջում Ալավերդյանն ասաց, որ Հայաստանը պետք է միջազգային հանրության համար ավելի հնչեղ դարձնի Լեռնային Ղարաբաղի հիմնախնդիրը, քանի որ մինչև օրս մեր տարածաշրջանում տեղի ունեցածը երկրորդ պլան է մղված։
