ԵՐԵՎԱՆ, 8 հունիսի — Sputnik. Իրանցի մասնագետները հունիսին կժամանեն Հայաստան, որպեսզի օգնեն Իրան-Հայաստան երկաթգծի շինարարությանը, չորեքշաբթի ասաց ՀՀ տրանսպորտի ու կապի նախարար Գագիկ Բեգլարյանը:
«Մասնագետներն այս ամիս գալու են Հայաստան, բայց վերջնական աշխատանքների իրականացման համար գումար է պետք: Ունենք տեխնիկական ուսումնասիրություն, աշխատում ենք նախագծի հետ գումարների վրա, բայց կարողանալու ենք ավելի կարևոր հարց լուծել Հյուսիս-Հարավ ավտոճանապարհի հետ կապված,- ասաց նա։
Երկու երկրի միջև երկաթգիծ կառուցելու բանակցություններն արդեն մի քանի տարվա պատմություն ունեն։ Նախագծին մասնակցելու ցանկություն են հայտնել նաև Չինաստանն ու Արաբական Միացյալ Էմիրությունները։
ՀՀ տրանսպորտի ու կապի նախարար Գագիկ Բեգլարյանը, խոսելով Հյուսիս-Հարավ ավտոճանապարհի շինարարության մասին, նշեց, որ այդ ճանապարհի կառուցման շնորհիվ մի շարք կարևոր հարցեր կլուծվեն։
«Բետոնային ճանապարհը՝ Ագարակից սկսած, փոխել ենք ասֆալտապատ ճանապարհով ու երկու տարի անց կունենաք Ագարակ-Սիսիան հատվածը, որը 70 կմ–ով կրճատում է ճանապարհը։ Քաջարանի մոտ կառուցվելու է 5 կմ թունել, որով առաջարկում ենք իրանցիներին ճանապարհ, որ մինչև երկաթգծի գումար գտնելը, հասնեն Երազք, մինչև Երազք ճանապարհ ունենան»,- նշեց նախարարը:
Նրա խոսքով` այդ ճանապարհն օգտագործելու հետ կապված պայմանավորվածություններ կան իրանական մի քանի տրանսպորտային ընկերությունների հետ։
