ԵՐԵՎԱՆ, 8 հունիսի — Sputnik. Չեխիայի խորհրդարանի ստորին պալատի ղեկավար Յան Գամաչեկը Twitter-ի իր էջում գրել է, որ պատմական իրադարձությունների մասին պետք է խոսեն ոչ թե քաղաքական գործիչները, այլ` պատմաբանները։
Չեխիայի նախագահ Միլոշ Զեմանը երևանյան այցի ժամանակ հայտարարել է, որ պատրաստվում է Հայոց ցեղասպանությունը ճանաչելու կոչ անել իր երկրի խորհրդարանին։
«Ես հակված եմ այն կարծիքին, որ պատմական իրադարձությունների մասին պետք է խոսեն պատմաբանները և ոչ մի դեպքում` քաղաքական գործիչները»,- գրել է Յան Գամաչեկը։
Նմանատիպ կարծիք է հայտնել նաև Չեխիայի արտգործնախարար Լուբոմիր Զաորալեկը։
«Դա քաղաքական հայտարարություն է։ Վստահ եմ, որ ավելի քան միլիոն հայի սպանությունն իսկապես չափազանց ողբերգական ու դաժան իրադարձություն է` սարսափելի հետևանքներով։ Սակայն կարծում եմ, որ անկախ պատմաբանները պետք է գնահատական տան, թե ովքեր են կրելու պատասխանատվությունը»,- ասել է Զաուրալեկը կառավարության նիստից հետո։
Նա նշել է, որ Չեխիան շատ լավ հարաբերութուններ ունի Հայաստանի հետ և փորձում է երկխոսություն վարել նաև Թուրքիայի հետ։
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
