ԵՐԵՎԱՆ, 8 հունիսի — Sputnik. Կառավարությունը շաբաթվա ընթացքում կքննարկի «Զինապարտության մասին» օրենքում փոփոխություններ կատարելու մասին նախագիծը, Ազգային ժողովում ասաց կառավարության աշխատակազմի ղեկավար-նախարար Դավիթ Հարությունյանը։
Ապրիլի վերջին Հարությունյանը հայտնել էր, որ մեկ ամսվա ընթացքում Ազգային ժողովին կներկայացվի ուսանողների տարկետումը չեղարկելու մասին օրենքի նախագիծը։
«Նախագիծը լրամշակում է Կրթության և գիտության նախարարությունը, իմ տվյալներով՝ աշխատանքներն ավարտվել են: Այնպես որ առաջիկայում կլինի քննարկումը», — ասաց Հարությունյանը:
Նրա խոսքով` քննարկմանը կհրավիրվեն նաև պատգամավորներ Ռուբեն Հակոբյանն ու Թևան Պողոսյանը, որոնք նմանատիպ օրինագիծ էին ներկայացրել դեռ երկու տարի առաջ։
