ԵՐԵՎԱՆ, 8 հունիսի — Sputnik. Նախագահ Սերժ Սարգսյանն իրատեսական է նայում Հայաստանի տնտեսական իրավիճակին։ Նրա խոսքով` արտասահմանյան ներդրողները կռիվ չեն տալիս Հայաստան գալու համար, բայց մեր խնդիրն է, որ այդ ներդրողները շատանան, այնքան ժամանակ, մինչև դերերը փոխվեն։
«Ուրախությամբ պետք է նշեմ, որ այսօր Հայաստանում գործում է չեխական կապիտալով շուրջ 20 ընկերություն։ Գաղտնիք չէ, որ ներդրումները հոսում են այնտեղ, որտեղ առկա է երկու կարևոր գործոն` կայունություն և տնտեսական շահ։ Կարող եմ վստահաբար ասել, որ Հայաստանում այս առումով ստեղծված են բոլոր նախադրյալները»,- ասաց Սերժ Սարգսյանը։
Նա ներկաներին տեղեկացրեց, որ 2015 թվականին Հայաստանն ունեցել է 3 տոկոս տնտեսական աճ։ Սա այն դեպքում, երբ տարածաշրջանի երկրներից շատերը համատարած տնտեսական անկում են գրանցել։
«Եթե մենք ունենայինք Չեխիայի տնտեսական ցուցանիշները, ապա մենք կուրախանայինք 3 տոկոս տնտեսական աճով, բայց քանի որ մեր ցուցանիշները շատ ավելի համեստ են, 3 տոկոս տնտեսական աճը մենք համարում ենք անբավարար, ուստի պետք է շատ ջանքեր ներդնենք, որպեսզի այս 3 տոկոսը գոնե եռապատկենք։ Տնտեսական ազատությամբ Հայաստանը ԱՊՀ երկրներում առաջատար է, ինչի մասին են վկայում միջազգային հեղինակություն ունեցող կազմակերպությունների վարկանիշային զեկույցները»,-նշեց նախագահը։
Սերժ Սարգսյանը վստահեցրեց` Հայաստանում օտարերկրյա ներդրումներն ամբողջությամբ պաշտպանված են։ Չնայած մեր երկրի տնտեսությունը փոքր ծավալներ, բայց և հսկայական պոտենցիալ ունի։ Եթե կան արտասահմանյան խոշոր տնտեսվարողներ, որոնց համար 3 միլիոնանոց հայկական շուկան փոքր է, ապա պետք է նկատի ունենալ, որ Հայաստանն անդամակցում է ԵՏՄ-ին։ Նախագահ Սարգսյանի խոսքով` մենք 170 միլիոնանոց շուկայի ենք անդամակցում, որտեղ տարբեր տեսակի ապրանքների մեծ պահանջարկ կա։
«Ինչպես մեր հանդիպման ժամանակ պարոն Զեմանն ասաց, մենք պարտավոր ենք ուշադիր լինել, այն ինչ նախատեսված է օրենքով, անշուշտ պետք է 100 տոկոս կատարվի, բայց պետք է նաև ջանքեր ներդնենք, որպեսզի որևէ երևույթ, որևէ անհաջող գործարք չմթագնի մեր տնտեսական հարաբերությունները»,- ասաց Սերժ Սարգսյանը։
Իր խոսքում նա ավելացրեց, որ մենք ունենք հումքի առանց մաքսատուրքերի ներմուծման իրավունք ԵՏՄ երկրներից, ինչպես նաև 750 ապրանքատեսակի համար ներմուծման արտոնյալ պայմաններ 3-րդ երկրներից։
Մենք զրուցեցինք նաև չեխ գործարարի հետ, ով հայտնեց, որ հետաքրքրված են Հայաստանով ու տարին մեկ անգամ պարտադիր գալիս են այստեղ։
«Մենք համոզված ենք, որ հնարավոր է գտնել նոր մթերքներ, որոնց ուղղությամբ հնարավոր կլինի աշխատել։ Հայաստանի շուկան չեխականի պես փոքր է, բայց ԵՏՄ-ն լայն հնարավորություններ է տալիս։ Հայաստանը լավ կապեր ունի, որոնք մենք չունենք»,-ասաց Ֆրանտիշեկ Մասոպուստը։
Ճանապարհաշինություն, տրանսպորտային միջոցներ և ավիափոխադրումներ։ Ահա այն ոլորտները, որտեղ համագործակցությունը, ըստ չեխ գործարարի, ցանկալի պտուղներ կտա։
