ԵՐԵՎԱՆ, 8 հունիսի — Sputnik, Արմենուհի Մխոյան. Ճգնաժամային կառավարման պետական ակադեմիայի դասախոս, փոխգնդապետ Հովհաննես Խաչատրյանն արդեն 27 տարի է` հրշեջ-փրկարար է, ավելին` իր տարիների փորձն ու գիտելիքներն է փոխանցում ապագա փրկարարներին: 1988 թվականի ավերիչ երկրաշարժին եկել է Լենինական ու օգնել փլատակների տակ մնացածներին: Այսօր, տարիներ անց, փոխգնդապետ Հովհաննեսն արդեն վստահաբար ասում է` եթե այսօրվա գիտելիքներն ու հագեցվածությունը լինեին, Սպիտակի ավերիչ երկրաշարժի զոհերի թիվն այդքան չէր լինի:
«Տարբերությունը շատ մեծ է՝ այն ժամանակ չենք ունեցել փրկարարական ծառայություն. պարզապես ջոկատներ էին, որոնք նախնական օգնություն էին կատարում։ Դա «Լոռի» ու «Սպիտակ» ջոկատներն էին: Ես արմատներով Շիրակից եմ ու եկել էի իմ հարազատներին օգնության։ Այդ ժամանակ ես հրշեջ էի: Հիմա ժողովուրդն ավելի պատրաստ է, քան 88 թվականին: Նախ՝ դասեր քաղեցինք, ապա տեխնիկապես լավ զինված ենք, ժողովուրդն էլ իրազեկ է, իսկ ամենակարևորը՝ ժողովրդի մեջ հավատ կա փրկարարների նկատմամբ»,- նշեց Հովհաննես Խաչատրյանը՝ վստահեցնելով որ տարեցտարի փրկարարական ծառայությունն ավելի է հզորանալու:
Փոխգնդապետ Հովհաննես Խաչատրյանն իր մասնագիտական վերելքին հասել է ամենացածրից ՝ սկսել է շարքային հրշեջից, հասել մինչև բարձր կոչման, դարձել ակադեմիայի դասախոս:
«Այսօր արդեն վախ չկա: Գուցե երբ նոր էի սկսում, վախը կար, բայց ոչ հիմա: Հիմա մեր ցանկացած փրկարար ցանկացած փլատակի կմոտենա ու չի հարցնի` ո՞վ է, ի՞նչ է: Մեր երիտասարդները հիմա շատ ավելի պատրաստ են: Ժողովուրդն էլ հարգում ու սիրում է փրկարարին: Առաջինը, որ ցանկացած աղետի ժամանակ մտածում ես՝ հասնելով դեպքի վայր, մարդկանց օգնելն է»,- վստահեցրեց Հովհաննես Խաչատրյանը:
Փոխգնդապետ Հովհաննես Խաչատրյանը Երևանի արագ արձագանքման փրկարարական ջոկատի հետ Գյումրիում մասնակցում էր ՀՀ արտակարգ իրավիճակների նախարարության և Շվեյցարիայի զարգացման գործակալության հետ համատեղ իրականացվող երկօրյա վարժանքին՝ ուժեղ երկրաշարժի սցենարով:
Երևանի ջոկատից բացի, վարժանքին մասնակցում էր ևս 4 ջոկատ՝ Շիրակից, Տավուշից, Սյունիքից, Լոռիից: Այս ջոկատներն իրենց կարողություններով համապատասխանում են միջազգային չափանիշներին: Երևանի թիմը ՄԱԿ-ի կողմից միջազգային որակավորում է ստացել: Միջոցառման հիմնական նպատակներն են` ուժեղ երկրաշարժի դեպքում բնակչության պաշտպանության միջոցառումների կազմակերպման և իրականացման գործում ՀՀ պետական կառավարման մարմինների հմտությունների ու ունակությունների կատարելագործումը:
Ըստ սցենարի՝ 2016 թ.-ի հունիսի 7-ին տեղական ժամանակով 01:40-ի սահմաններում գրանցվել է 6.5 մագնիտուդով պայմանական երկրաշարժ, որի էպիկենտրոնը գտնվում է Գյումրի քաղաքից 9 կմ հյուսիս-արևմուտք: Կան պայմանական զոհեր ու վիրավորներ: Որոնողափրկարարական գործողությունները տևելու են 36 ժամ: Յուրաքանչյուր թիմի համար պատրաստված են առանձին աշխատանքային տեղամասեր՝ նրանց առջև դրված են տարբեր բարդությունների առաջադրանքներ:
Վարժանքի ընթացքում ՀՀ արտակարգ իրավիճակների փոխնախարար Հայկարամ Մխիթարյանը և Հայաստանում Շվեյցարիայի դեսպան Լուկաս Գասսերը տարբեր նախարարությունների, մարզային իշխանությունների ներկայացուցիչների հետ այցելեցին իրականացվող վարժանքների տարածքներ` հնարավորություն ունենալով հետևելու հայ փրկարարների գործողություններին, որոնք իրականին մոտ տարբեր փրկարարական իրավիճակներ էին:
Թիմերը ստեղծվել են Շվեյցարիայի ֆինանսական և փորձագիտական օժանդակությամբ: Այս վարժանքը վերջինն է շվեյցարական փորձագետների մասնակցությամբ, որոնք մի քանի տարի շարունակ աջակցել են այս խմբերի ձևավորման գործին: 2004 թվականից ի վեր Շվեյցարիան աջակցություն է ցուցաբերում Հայաստանում փրկարարության և արձագանքման տեղական ու կենտրոնական համակարգ ստեղծելու ուղղությամբ: Այդ աջակցության արդյունքում 235 փրկարար, 540 բուժաշխատող և 2400 հրշեջ է ուսուցում անցել և ապահովվել հանդերձանքով ու սարքավորումներով՝ Միջազգային որոնողափրկարարական խորհրդատվական խմբի կողմից մշակված ստանդարտներով: Շվեյցարիան սկսել է ծավալել իր առաջին գործողությունները Հայաստանում դեռևս 1988 թվականից, երբ շվեյցարական փրկարարները օգնություն էին ցուցաբերում Հայաստանի բնակչությանը Սպիտակի ավերիչ երկրաշարժից հետո:
