ԵՐԵՎԱՆ, 8 հունիսի — Sputnik. Լեռնային Ղարաբաղի ազգային ժողովի «Վերածնունդ» ընդդիմադիր խմբակցության ղեկավար Հայկ Խանումյանին ծեծի ենթարկելը սովորական խուլիգանություն է, լրագրողներին ասաց ՀՀ ԱԺ խոսնակ Գալուստ Սահակյանը։
Հայկ Խանումյանին ծեծի էին ենթարկել հունիսի 6-ին, նախորդ օրը նա Ստեփանակերտում ակցիա էր կազմակերպել` պահանջելով Սամվել Բաբայանին Ղարաբաղի պաշտպանության նախարար նշանակել։
«Ինչ կապ ունի, եթե անձը քաղաքական է, չի՞ կարող լինել խուլիգանություն: Ես այդպես եմ մտածում»,- խորհրդարանում լրագրողների հետ զրույցում ասաց Սահակյանը։
Խոսնակը մեկնաբանել է նաև Բաբայանի համախոհների պահանջները` նրան պաշտպանական գերատեսչությունում նախարար նշանակելու վերաբերյալ։
«Սամվել Բաբայանը պատերազմի ժամանակ լուրջ կռվող է եղել, դրանից հետո հանցագործություն է կատարել, հետո տարբեր երկրներում, աշխարհում ման է եկել, հիմա եկել է, գործ է ուզում. ի՞նչ` պիտի գործ ճարե՞ն, տան»,- ասաց Գալուստ Սահակյանը:
Սամվել Բաբայանը 1992 թվականից համակարգում էր Ղարաբաղի պաշտպանական շրջանների ռազմական գործողությունները, մասնակցել է Շուշիի ազատագրման գործողությունների մշակմանը։ 1994 թվականի մայիսի 11-ին նա Ղարաբաղի անունից հրադադարի մասին համաձայնագիր է ստորագրել Ադրբեջանի հետ։
Բաբայանը 2000 թվականին Լեռնային Ղարաբաղի Հանրապետության նախկին նախագահ Արկադի Ղուկասյանի վրա մահափորձ կազմակերպելու մեղադրանքով դատապարտվել էր 14 տարվա ազատազրկման։ Շուշիի բանտում 4.5 տարի անցկացնելուց հետո 2004 թվականին նրան ներում էր շնորհվել, և Բաբայանն ազատ էր արձակվել։ Նա տեղափոխվել էր Երևան և քաղաքականությամբ էր զբաղվում։
2005 թվականին հիմնեց «Դաշինք» կուսակցությունը, սակայն այդպես էլ լուրջ հաջողությունների չհասավ։ 2010 թվականին Բաբայանը հեռացավ Հայաստանից։
