ԵՐԵՎԱՆ, 8 հունիսի-Sputnik. Չեխիայի նախագահ Միլոշ Զեմանը պատրաստվում է առաջարկել երկրի խորհրդարանին քննարկել Օսմանյան կայսրությունում 1915թ.-ին Հայոց ցեղասպանության ճանաչման հարցը։
«Ես մտադիր եմ դիմել խորհրդարանին, որպեսզի հետևի Գերմանիայի օրինակին և նման հայտարարություն ընդունի»,- ասաց Զեմանը Հայաստանի նախագահ Սերժ Սարգսյանի հետ համատեղ ճեպազրույցի ընթացքում։
Միլոշ Զեմանը նշեց, որ Ցեղասպանության վերաբերյալ իր դիրքորոշումը հայտնել է դեռևս 2014 թվականին, նախագահ Սերժ Սարգսյանի այցի ժամանակ։
«Դա պայմանավորված է նաև այն փաստով, որ նացիստական Գերմանիայի հաղթանակի դեպքում իմ ազգն ու ժողովուրդն էլ կկրեր նման տույժեր, և պատմությունը կնմանվեր»,-ասաց Միլոշ Զեմանը։
Զեմանի խոսքով` ինքը քաջատեղյակ է, որ Եվրամիության 10 երկիր ճանաչել է Ցեղասպանությունը։ Նա հիշատակեց նաև Կանադան և Ռուսաստանը։
«Որպես իմ հայտարարությանը հաջորդող քայլ` կդիմեմ Չեխիայի խորհրդարանին, որ Գերմանիայի խորհրդարանին հետևելով` նրանք էլ նման հայտարարություն անեն»,-ասաց Չեխիայի նախագահը։
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
