ԵՐԵՎԱՆ, 8 հունիսի — Sputnik. Ամենայն հայոց կաթողիկոսը պետք է բարձրացնի Հայ առաքելական եկեղեցու Կոստանդնուպոլսի պատրիարքի փոխանորդ, արքեպիսկոպոս Արամ Աթեշյանին կարգալույծ անելու հարցը, ասաց ԲՀԿ խմբակցության ղեկավար Նաիրա Զոհրաբյանը` չորեքշաբթի ելույթ ունենալով խորհրդարանում։
Ավելի վաղ Աթեշյանը նամակ էր ուղղել Թուրքիայի նախագահ Ռեջեփ Էրդողանին, որում դատապարտել էր Բունդեսթագի` Հայոց ցեղասպանության մասին ընդունած բանաձևը։
Զոհրաբյանի խոսքով` Աթեշյանի քայլն ազգային պետական դավաճանություն է, որից պետք է հետևություններ անել։ «Դա պետական դավաճանություն է բարձրաստիճան հոգևորականի կողմից։ Մենք ակնկալում ենք, որ Ամենայն հայոց կաթողիկոսը, ելնելով իր լիազորություններից, կբարձրացնի Աթեշյանին հեռացնելու հարցը»,- ասաց Զոհրաբյանը։ Նրա խոսքով` այդ հարցով նրան դիմել են հայ համայնքի շատ ներկայացուցիչներ։ Էրդողանին ուղարկված նման անբարոյական նամակն ամոթալի երևույթ է հայերի համար, հենց այդ պատճառով պետք է անհրաժեշտ քայլեր ձեռնարկել։
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
