ԵՐԵՎԱՆ, 7 հունիսի-Sputnik. Չեխիայի նախագահ Միլոշ Զեմանի պետական այցը Հայաստան կսկսվի Երևանում Հայոց ցեղասպանության թանգարան այցելությամբ, հաղորդում է ՀՀ նախագահի պաշտոնական կայքը։ Նա երեքշաբթի երեկոյան ժամանում է Երևան։
«Չորեքշաբթի օրվա առաջին կեսին նախագահ Միլոշ Զեմանը կայցելի Հայոց ցեղասպանության թանգարան, ծաղկեպսակ կդնի ցեղասպանութան զոհերի հուշահամալիրում և ծառ կտնկի թանգարանային համալիրի տարածքում»,- ասվում է հաղորդագրությունում։
Դրանից հետո տեղի կունենան Միլոշ Զեմանի և Հայաստանի նախագահ Սերժ Սարգսյանի բանակցությունները։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
