ԵՐԵՎԱՆ, 7 հունիսի — Sputnik. Հայաստանի Հանրապետության կառավարությանն առընթեր Քաղաքացիական ավիացիայի գլխավոր վարչության պետ Արտյոմ Մովսեսյանն ազատվել է աշխատանքից, հայտնում են ՀՀ կառավարությունից։
Ըստ հաղորդման` Մովսեսյանն աշխատանքից ազատվել է սեփական դիմումի համաձայն։
«Հիմք ընդունելով Հայաստանի Հանրապետության նախագահի 2007 թվականի հուլիսի 18-ի ՆՀ-174-Ն հրամանագրով սահմանված կարգի 121-րդ կետի 6-րդ ենթակետը և Հայաստանի Հանրապետության կառավարության 2003 թվականի փետրվարի 13-ի N 202-Ն որոշման N 1 հավելվածի 9-րդ կետը՝
Արտյոմ Մովսեսյանին ազատել Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության պետի պաշտոնից` իր դիմումի համաձայն»,- ասված է հրամանագրում։
Վերջին ժամանակներս ՔԱԳՎ ղեկավարի աշխատանքի նկատմամբ բազմաթիվ քննադատություններ էին հնչում, այդ թվում` կապված երկրի ավիացիոն շուկայի իրավիճակի հետ։
