ԵՐԵՎԱՆ, 7 հունիսի — Sputnik, Արմենուհի Մխոյան. Գյումրին և Պետրոպավլովսկ-Կամչատսկը կդառնան քույր քաղաքներ. հունիսի 7-ին ՀՀ Շիրակի մարզկենտրոն Գյումրու և ՌԴ Կամչատկայի երկրամասի մարզկենտրոն Պետրոպավլովսկ-Կամչատսկի միջև ստորագրվեց փոխըմբռնման հուշագիր, որն էլ հետագայում քույր քաղաքների միջև կնքվելիք համաձայնագրի հիմք կդառնա:
Փոխըմբռնման հուշագիրը ստորագրելու նպատակով Գյումրիում է Պետրոպավլովսկ-Կամչատկսկի պատվիրակությունը՝ քաղաքապետ Կոնստանտին Սլիշչենկոյի գլխավորությամբ:
Պատվիրակության` Գյումրի կատարած այցի ընթացքում Գյումրու քաղաքապետ Սամվել Բալասանյանը շնորհակալություն հայտնեց Կամչատկայի երկրամասի հայերի միության նախագահ Արթուր Խաչատրյանին՝ հանդիպման նախաձեռնության ու համագործակցության համար:
«Գյումրու կապը ՌԴ —ի հետ ոչ միայն Գյումրիում տեղակայված ռուսական 102-րդ ռազմաբազան է, այլև այն պատմական կառույցները, որոնք կառուցվել են քաղաքում դեռ Նիկոլայ I-ին ցարի օրոք, իսկ դրանք շատ են՝ ամրոցներ, եկեղեցիներ, իսկ «Պատվո բլուր» հուշահամալիրում ամփոփված են ռուս-թուրքական պատերազմի ժամանակ զոհված ռուս զինվորականների աճյունները»,- հանդիպման ընթացքում նշեց Գյումրու քաղաքապետը՝ կարևորելով հայ-ռուսական հարաբերությունները:
Կոնստանտին Սլիշչենկոն, ողջունելով ներկաներին, շնորհակալություն հայտնեց ջերմ ընդունելության համար և ներկայացրեց իրենց քաղաքի պատմությունը, խոսեց հայկական համայնքի մասին: Չնայած երկար ճանապարհին` պատվիրակության ղեկավարն ասաց, որ անչափ ուրախ է հաճելի առաքելությամբ Գյումրիում գտնվել:
«Ճիշտ է, մեր քաղաքը հին է, բայց ոչ այնքան, որքան Գյումրին: Համեմատելիս մենք երիտասարդ քաղաք կարող ենք համարվել, բայց 180 հազար բնակչություն ունեցող քաղաքը ռազմական փառքի քաղաք է»,-նշեց քաղաքապետ Կոնստանտին Սլիշչենկոն։
Նա հույս հայտնեց, որ 2 քաղաքապետերի միջև ստորագրված փոխըմբռնման համաձայնագիրը քաղաքների միջև հետագա համագործակցության գերազանց հիմք է կդառնա:
«Այս համաձայնագրի ստորագրման գործում մեծ ներդրում ունի ՌԴ հայերի միությունը և Պետրոպավլովսկ-Կամչատսկի հայ համայնքը, որը ամենամեծ համայնքներից մեկն է, ամենահզոր ու աշխատող համայնքը։ Երբ պետք է, հայ համայնքը քաղաքի ղեկավարության կողքին է, իսկ անհրաժեշտության դեպքում էլ քաղաքի ղեկավարությունն է ձեռք մեկնում հայ համայնքին, քանի որ հայերն ու ռուսները միշտ բարեկամներ եղել են ու այդպիսիք կմնան»,-նշեց Կոնստանտին Սլիշենկոն։
Նրա խոսքով` Գյումրին շատ ինքնատիպ քաղաք է, որը երբեք այլ քաղաքների հետ չես շփոթի:
«Գյումրին հենց այդպիսին է, ունի իր պատմական դեմքը, և հուսով եմ, որ արդեն շատ շուտով մենք կկնքենք համագործակցության պայմանագիր երկու քաղաքների միջև»,- հավելեց Կոնստանտին Սլիշչենկոն և ճանաչողական այցով Պետրոպավլովսկ-Կամչատսկ հրավիրեց Գյումրու պատվիրակությանը՝ Սամվել Բալասանյանի գլխավորությամբ:
Հանդիպման ընթացքում Սամվել Բալասանյանը պարգևատրվեց Ռուսաստանի հայերի միության մեդալով, որը քաղաքապետին փոխանցեց ՌՀՄ փոխնախագահ Գերման Անանյանցը։ Մեդալի արժանացավ նաև Պետրոպավլովսկ-Կամչատսկի քաղաքապետ Կոնստանտին Սլիշչենկոն:
