ԵՐԵՎԱՆ, 7 հունիսի- Sputnik. Լեռնային Ղարաբաղը որոշակի փուլում կարող է վերադառնալ բանակցությունների սեղանի շուրջ, օրինակ, հակամարտության կարգավորման շրջանակային պայմանավորվածություն ձեռք բերելուց հետո, երեքշաբթի «Ինտերֆաքսին» հայտարարել է ԵԱՀԿ Մինսկի խմբի ռուս համանախագահ, ՌԴ ԱԳՆ հատուկ հանձնարարությունների դեսպան Իգոր Պոպովը։
«Իսկապես, ներկա փուլում ղարաբաղցիները բանակցություններին պաշտոնապես չեն մասնակցում։ Սակայն այդ թեմային շատ ուշադրություն է հատկացվում համանախագահների հանդիպումների ընթացքում թե´ Հայաստանում, թե´ Ադրբեջանում և թե´ Լեռնային Ղարաբաղում։ Ենթադրում եմ, որ որոշակի փուլում, օրինակ, շրջանակային պայմանավորվածություն ձեռք բերելուց հետո կդիտարկվի այն բանի հնարավորությունը, որպեսզի նրանք կարողանան վերադառնալ բանակցությունների սեղանի շուրջ»,- կարծում է Պոպովը։
Այն հարցին, թե ռուսական կողմն ինչպես կվերաբերվի Մինսկի խմբի համանախագահների թիվն ընդլայնելու առաջարկներին, այդ թվում` Գերմանիայի հաշվին, բարձրաստիճան դիվանագետը պատասխանել է, որ ԵԱՀԿ ՄԽ համանախագահների թվի ընդլայնման թեման «ժամանակ առ ժամանակ հայտնվում է ԶԼՄ-ներում և ակտիվ շրջանառվում քաղաքագիտական հանրության կողմից»։
«Սակայն կողմերի հետ մեր «եռյակի» բանակցությունների (ԵԱՀԿ ՄԽ համանախագահներ Ռուսաստանից, Ֆրանսիայից և ԱՄՆ-ից) ընթացքում և այլ միջնորդների հետ հանդիպումների ընթացքում համանախագահների թվի ավելացման նախաձեռնություններ չեն եղել։ Չէ՞ որ կարգավորման պայմանավորվածության հանգելը կախված է ոչ թե համանախագահների թվից, այլ փոխզիջման գալու` կողմերի պատրաստակամությունից»,- ասել է ռուս համանախագահը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկելու դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
«Ինչ վերաբերում է Գերմանիային, ապա նա` որպես ԵԱՀԿ գործող նախագահ և Մինսկի խմբի անդամ, ակտիվ աշխատում է ղարաբաղյան կարգավորման ուղղությամբ, անմիջական մասնակցություն ունենում Վիեննայի պայմանավորվածությունների իրագործմանը` կապված կողմերի միջև վստահության միջոցների ամրապնդման հետ»,- հայտարարել է Պոպովը։
