ԵՐԵՎԱՆ, 7 հունիսի. — Sputnik. Վտանգի պահին բոլորը պետք է համախմբվեն, ոչ թե քարեր նետեն իրար վրա, ասաց ՀՀ ԱԺ փոխխոսնակ Էդուարդ Շարմազանովը` մեկնաբանելով ԼՂՀ պաշտպանության նախկին նախարար Սամվել Բաբայանի` իշխանություններին ուղղված քննադատությունը։
Ավելի վաղ Սամվել Բաբայանը քննադատել էր Ղարաբաղի իշխանությունների և հորդորել հրաժարական տալ, եթե չի կարողանում լուծել խնդիրները։
«Ես զինվորական չեմ և չեմ ուզում տարբեր զինվորականների գնահատականների մեջ իմ դիլետանտ գնահատականով հանդես գալ։ ԼՂՀ պաշտպանության նախարար Լևոն Մնացականյանը մանրամասն ներկայացրել է իր մեկնաբանությունը։ Ես` որպես ԱԺ փոխխոսնակ և որպես սովորական մարդ ու ամենակարևորը` պատմաբան, ասում եմ` վտանգի պահին իրար վրա քար նետելու ժամանակը չէ»,- ասաց Շարմազանովը։
Նրա խոսքով` համակարգում առկա թերությունների մասին շատ լավ գիտեն և Հայաստանի, և Ղարաբաղի իշխանությունները։
Սամվել Բաբայանը 2000 թվականին Լեռնային Ղարաբաղի Հանրապետության նախկին նախագահ Արկադի Ղուկասյանի վրա մահափորձ կազմակերպելու մեղադրանքով դատապարտվել էր 14 տարվա ազատազրկման։ Շուշիի բանտում 4.5 տարի անցկացնելուց հետո 2004 թվականին նրան ներում էր շնորհվել, և Բաբայանն ազատ էր արձակվել։ Նա տեղափոխվել էր Երևան և քաղաքականությամբ էր զբաղվում։
2005 թվականին հիմնեց «Դաշինք» կուսակցությունը, սակայն այդպես էլ լուրջ հաջողությունների չհասավ։ 2010 թվականին Բաբայանը հեռացավ Հայաստանից։
