ԵՐԵՎԱՆ, 7 մայիսի — Sputnik. Խաղալիքների, ԱԳԼՃԿ-ի, ավտոմոբիլային բենզինի և յուղերի բնագավառում գործող տնտեսվարող սուբյեկտներին զգուշացվեց` վաճառքի ժամանակ սերտիֆիկատ ունենալը պարտադիր է։
Եվրասիական տնտեսական միությանն անդամակցելով` Հայաստանում օրենսդրական փոփոխություններ տեղի ունեցան։ Էկոնոմիկայի նախարարությունում կազմակերպված իրազեկող միջոցառումը միտված էր տնտեսվարող սուբյեկտներին ծանոթացնել այդ փոփոխություններին ու խուսափել տեսչական ստուգումներին հետևող տույժ-տուգանքներից։
«Այն ապրանքը, որը վերցնում եք վերավաճառելու, պետք է պահանջ դնեք, որ ունենա սերտիֆիկատ, հակառակ դեպքում դուք եք պատասխանատվություն կրում ձեզ մոտ վաճառվող ապրանքի համար»,-ասաց Շուկայի վերահսկողության տեսչական մարմնի ղեկավար Լևոն Խալիկյանը։
Նա հիշեցրեց, որ տեսչական ստուգումները սկսվելու են ընթացիկ տարվա սեպտեմբերից, հետևաբար պետք է կարգավորել սերտիֆիկատների հարցը։ Պահանջը վրդովմունք առաջացրեց «Առինջ մոլ» տոնավաճառի տնօրեն Սամվել Հակոբյանի մոտ։ Նա ընդգծեց, որ սերտիֆիկատ պահանջելը ենթադրում է հավելյալ գումար վճարել, իսկ այդ դեպքում, նրա խոսքով, վաճառականների մեծ մասն այլևս չի մտնի տոնավաճառ։
«Այն մարդը, ով երկու տարի ապրանքը բերել է, պահել պահեստում, չենք կարող ստիպել, որ գնան, սերտիֆիկատ հանեն։ Դուք չեք պատկերացնում` ժողովուրդն այսօր ինչ վատ վիճակում է»,-ասաց նա։
Ի պատասխան Լևոն Խալիկյանն ասաց, որ եթե վաճառականները սոցիալապես լավ վիճակում չեն, բոլորովին չի նշանակում, թե պետք է անորակ ապրանք վաճառեն։
«Եթե ներմուծում եք այլ երկրից, պարտավոր եք սերտիֆիկատ պահանջել։ Դուք որպես տոնավաճառի տնօրեն պետք է համոզված լինեք, որ ձեզ մոտ վաճառվող ապրանքներն անվտանգ են։ Հավաքվել ենք, որ գտնենք խնդրի լուծումները։ Մենք ոլորտային հանդիպումները կազմակերպում ենք տույժ ու տուգանքից խուսափելու համար»,-ասաց Խալիկյանը։
Նա ընդգծեց, որ սերտիֆիկատ ունենալու դեպքում վաճառողը կարող է հանգիստ լինել։ Եթե գնորդի մոտ ապրանքը իրացնելուց հետո առաջանում են առողջական կամ այլ խնդիրներ, պատասխան է տալիս այն կողմը, որը սերտիֆիկատ է տվել։ Նույն պայմանը գործում է նաև արտահանող ընկերությունների պարագայում։ ԵՏՄ շուկայում ցանկացած երկիր նույնպես սերտիֆիկատ է պահանջելու։
Հայաստանում սերտիֆիկատ տրամադրող կազմակերպություններից մեկի տնօրենն էլ ներկաների ուշադրությունը հրավիրեց մի կարևոր հանգամանքի վրա. Հայաստան ներմուծվող ապրանքների զգալի մասը գալիս է Թուրքիայից։ Նա հավանական համարեց, որ հարևան պետությունից ներկրվող ապրանքները կարող են կիրառվել որպես բիոլոգիական զենք, որը գործում է դանդաղ, բայց «արդյունավետ»։
«Մի օր պարզապես կարող ենք դառնալ ոչնչացող գենոֆոնդ։ Հարգելի ներկաներ, սերտիֆիկատի գների մասին մտահոգվելուց առաջ առաջնորդվեք նաև ազգային մտածելակերպով»,- ասաց նա։
Նախատեսվում է նման ձևաչափով հանդիպումներ կազմակերպել նաև ոչ պարենային ապրանքների ոլորտի այլ ներկայացուցիչների հետ։
