ԵՐԵՎԱՆ, 7 հունիսի — Sputnik, Անի Լիպարիտյան. Առավոտյան 9:30-ին փոքր-ինչ շփոթված դպրոցականները սրտի թրթիռով մտան դպրոց, ստորագրեցին հատուկ թղթերի տակ ու բարձրացան երկրորդ հարկ։
Շրջանավարտները զբաղեցրին իրենց տեղերը, իսկ քննական հանձնաժողովի անդամները ներկայացրին քննություն հանձնելու կարգն ու նախազգուշացրին` խախտումներ նկատելուն պես աշակերտները կհեռացվեն դասարանից։ Ապագա ուսանողներին արգելվում էր խոսել միմյանց հետ, քայլել քննական դահլիճում ու օգտվել բջջային հեռախոսներից։
Քննություն ծնողների համար
Երևանի ծայրամասերից մեկում գտնվող թիվ 170 դպրոցի բակը մարդաշատ էր վաղ առավոտից։ Քննության եկած շրջանավարտներին գոտեպնդելու էին եկել նաև նրանց ծնողները։ Օրը հուզիչ էր ու պատասխանատու. շրջանավարտները միասնական քննություն պիտի հանձնեին։
Քննության եկածները անհանգստանում էին, բայց նաև մարտական էին տրամադրված. որոշել են անպայման բուհ ընդունվել և բարձրակարգ մասնագետներ դառնալ։
«Անհանգստանում ենք, հետևում», — ասաց մայրիկներից մեկը, որն էկրանի միջոցով ուշադիր հետևում էր որդուն։
Սակայն ոչ բոլոր ծնողներն էին կարողացել էկրանների վրա գտնել իրենց երեխաներին. պատկերն այդքան էլ հստակ չէր։
Այնպիսի տպավորություն էր, որ բակում կանգնած հարազատներն ավելի շատ էին հուզված, քան շրջանավարտները։
Կրթության և գիտության նախարար Լևոն Մկրտչյանը քննությունների մեկնարկից առաջ շրջեց դասարաններով ու հաջողություն մաղթեց շրջանավարտներին։
«Այս տարի քննություն հանձնելն ավելի հեշտ է, քան նախկինում։ Հուսով եմ` մյուս տարի բոլոր ներկաներին կտեսնեմ ուսանողների շարքում», — նշեց Մկրտչյանը։
«Քննությունն ինձ համար միշտ տոն է»
Հայաստանում այս տարի միասնական քննություն է հանձնում 11400 դիմորդ։ Այսօրվա քննությանը եկած դպրոցականները մեզ հետ զրույցում նշեցին, որ դասարաններում տեղադրված տեսախցիկներն իրենց բոլորովին էլ չեն կաշկանդում, և իրենց համար ամենակարևորն այն է, որ քննությունները հաջողությամբ հանձնեն ու ընդունվեն երազած բուհը։
Նրանք դասարան մտան զգուշավորությամբ, տարօրինակ հայացքներ գցեցին տեղադրված տեսախցիկների ուղղությամբ, ու քննությունը սկսվեց…
Զգացվում էր, որ նրանք ուզում են արագ հանձնել քննություններն ու տուն գնալ։
Կարելի էր ռեալիթի շոուի հետ զուգահեռներ տանել` աշակերտներին ցույց էին տալիս օնլայն ռեժիմով, և նրանց կարող էին հետևել բոլոր ցանկացողները։
