ԵՐԵՎԱՆ, 7 հունիսի — Sputnik. Հայաստանում 460 հակակարկտային կայան կա, որոնք տեղակայված են 8 մարզում` Արմավիր, Արագածոտն, Լոռի, Շիրակ, Տավուշ, Վայոց Ձոր, Կոտայք։ «Հիդրոմետ» ծառայության տնօրենի տեղակալ Արմեն Կարապետյանի խոսքով՝ դրանք աշխատում են հետևյալ սկզբունքով.
«Երբ վտանգավոր ամպերը մոտենում են, 100 կմ հեռավորության վրա դրանց սկսում են հետևել լակատորների վրա հերթապահող մասնագետները։ Իսկ երբ կարկտային գոյացությունները մոտենում են մեր սահմանին, իմանալով ամպերի տեղաշարժը` գործի են դրվում այդ տարածքում գտնվող հակակարկտային կայանները, որոնք աշխատում են հեռակառավարմամբ»։
Հայաստանյան հակակարկտային կայաններն աշխատում են գազագեներատորային մեթոդով, որի արդյունավետությունը, Արմեն Կարապետյանի խոսքով, ընդամենը 50% է կազմում։
«Եթե ամպերն արդեն զարգացած են այն աստիճանի, որ պետք է կարկուտ գա, կգա։ Հակակարկտային կայանը չի ցրում ամպերը, պարզապես չի թողնում, որ ամպերը հետագա զարգացում ապրեն։ Այսինքն` մենք ստիպում ենք, որ տեղումները տեղան այն աստիճանի, որքան այդ պահին կա։ Եթե հետագա զարգացումներ թույլ տանք, կարող է կարկտի հատիկներն ավելի մեծանան, և իրավիճակն աղետալի դառնա»,- ասում է Հիդրոմետ ծառայության տնօրենի տեղակալը։
Մեր զրուցակիցը չի բացառում նաև, որ հնարավոր է ամպերն անցնեն պաշտպանական շերտերը, մեկ այլ վայրում դարձյալ միավորվեն ու էլ ավելի խոշոր կարկուտ տեղա։
Ի դեպ, կարկտաբեր ամպերը Հայաստան են գալիս հիմնականում Թուրքիայի տարածքից, և եթե դրանց ուղղությամբ կրակոցներն արձակվեն ոչ թե Արարատյան դաշտի, այլ դեռևս Թուրքիայի երկնքում եղած ժամանակ, Արարատյան դաշտում այլևս տեղումներ չեն լինի։ Եվ ամպերը Հայաստան կհասնեն արդեն թուլացած։
«Չի բացառվում, որ որոշ արկեր չպայթեն և ընկնեն այլ պետության տարածք։ Այստեղ լուրջ խնդիրներ կառաջանան»,- ասում է Արմեն Կարապետյանը` հիշելով, որ խորհրդային իշխանության տարիներին հենց այդպես էլ անում էին՝ առանց հաշվի առնելու, թե Թուրքիայի հետ ինչ խնդիր կառաջանա։
Իսկ կարկուտներ դեռ էլի են սպասվում։ Մայիսից մինչև նոյեմբեր ընկած ժամանակահատվածը կարկուտների սեզոն է համարվում։ «Հիդրոմետ» ծառայության տնօրենի տեղակալ Արմեն Կարապետյանը վստահեցնում է, որ անելու են առավելագույնը հայաստանցիներին կարկուտից պաշտպանելու համար։
