ԵՐԵՎԱՆ, 6 մայիսի — Sputnik. Հայաստանում աշխատող ռուս գործարարները «Մուրացան» համալսարանական հիվանդանոցին բժշկական սարքավորում են նվիրել, որը մշտական հսկողության տակ է պահում արյան մեջ առկա շաքարի մակարդակը։
Նվիրատուները «Հերմես» ակումբի անդամներն են, որի կազմում Հայաստանում գործող շուրջ 35 ռուսական ընկերություն է ընդգրկված։ Ակումբը գործում է Ռուսաստանի դեսպանատանը կից, և այն ղեկավարում է Հայաստանում Ռուսաստանի արտակարգ և լիազոր դեսպան Իվան Վոլինկինը։
Ինչպես տեղեկացրեց Հայաստանի ԱՆ գլխավոր մանկական էնդոկրինոլոգ Ելենա Աղաջանովան, սարքավորումն անհրաժեշտ է դիաբետով հիվանդ մարդկանց համար, ովքեր ինսուլինի անհրաժեշտ քանակը որոշելու հետ կապված խնդիրներ ունեն։
«Այն 3-6 օր ամրացվում է երեխայի մարմնին և յուրաքանչյուր հինգ վայրկյանը մեկ չափում է գլյուկոզայի պարունակությունը», — ասաց Աղաջանովան։
«Մուրացանը» Հայաստանում գործող միակ կլինիկան է, որը մանկական էնդոկրինոլոգիայի ծառայություններ է մատուցում։
«Մեր կլինիկային կից հանրապետական դիսպանսեր է գործում, որտեղ գրանցված են դիաբետով հիվանդ երեխաների 95 տոկոսը։ Ոչ մի հիվանդանոց նման սարքավորում (iPro2) դեռ չունի։ Սարքի արժեքը 2 հազար դոլար է գնահատվում», — ասաց Աղաջանովան։
Նրա խոսքով` մարդու մարմնին միացվող սարքն օգտագործելու համար անհրաժեշտ է հատուկ սենսոր ձեռք բերել, որը կգրանցի անհրաժեշտ տվյալները։
Պետությունն ինսուլինն անվճար է տրամադրում, սակայն հետազոտությունը (ինչպես նաև մեկանգամյա օգտագործման սենսորների գնումը) ընդհանուր առմամբ շուրջ 60 հազար դրամ կարժենա։
«Մուրացան» համալսարանական հիվանդանոցի գլխավոր բժիշկ Բագրատ Բավեյանն ավելացրեց, որ սարքն առաջին անգամ է օգտագործվելու բժշկական պրակտիկայում։
«Սարքը թույլ կտա հստակ ախտորոշում իրականացնել և դոզավորել դուրս գրվող ինսուլինի քանակը», — նշեց Բավեյանը։
Մասնագետները հայտնեցին, որ Հայաստանում մինչև 18 տարեկան դիաբետիկների թիվը հասնում է 482-ի, իսկ ընդհանուր հաշվով այդ ցուցանիշը հասնում է 80 հազարի։ Սարքավորման օգնությամբ իրականացվող հետազոտության կարիք ունի նրանց 50 տոկոսը։
