Ընտանիքիներ էլ կան Շիրակի մարզից, որոնք Գոմք են տեղափոխվել Սպիտակի երկրաշարժից հետո։ Գյուղի բնակչությունը հիմնականում զբաղվում է անասնապահությամբ և հողագործությամբ։ Այսօր համայնքում 80-ից ավելի տնտեսություն կա` ավելի քան 250 բնակչով։
Մեզ հետ զրույցում գյուղացիներն ասացին, որ չքնաղ բնությունն իրենց ամուր պահում է, որ ոչ մի այլ տեղ չգնան։ Նրանց խոսքով` բերրի հողը տարբեր տեսակի միրգ ու բանջարեղեն աճեցնելու, դրանք վաճառելու ու ստացված հասույթով ապրելու հնարավորություն է տալիս։
Մենք տեղում համոզվեցինք, որ բնության հետ ներդաշնակ ապրող մարդիկ ավելին չեն ուզում, քան մի կտոր հացը, հողագործությունն ու անասնապահությունը, ինչպես նաև հանգիստ կյանքը։ Խոստովանեցին` գիշերն իրենց գլուխը հանգիստ բարձին են դնում ու դրանից կարևոր բան չունեն։ Միայն մի խնդիր ունեն` կուզեին, որ կառավարության սահմանած հարկային արտոնություններն իրենց գյուղ էլ հասնեին։
