ԵՐԵՎԱՆ, 4 հունիսի — Sutnik, Նելլի Դանիելյան. Անցյալ տարի մթերված 31.5 մլրդ դրամի խաղողի դիմաց 1.6 մլրդ դրամը գյուղացիները մինչ օրս դեռ չեն ստացել։ Մի քանի անգամ բողոքի ակցիաների միջոցով իրենց գումարները պահանջող Արարատի մարզի Քաղցրաշեն գյուղի բնակիչները վերջապես ստացել են իրենց պարտքերի մի մասը, մյուս մասն էլ կստանան մոտ ապագայում։ Այսօր լրագրողներին հայտնեց գյուղատնտեսության նախարարի տեղակալ Ռոբերտ Մակարյանը։
«Մի մասն այս շաբաթվա վերջին կվճարվի արդեն, մյուս մասի համար էլ գյուղացիների հետ կպայմանավորվենք»,- ասաց փոխնախարարը։
Գյուղացիների հետ իրենց իրավունքների պաշտպանության համար պայքարող Ագրարագյուղացիական միավորման նախագահ Հրաչ Բերբերյանին, սակայն, այս նորությունը ոչ միայն չի ուրախացնում, այլև հակառակը` մտահոգում է։
«Ես դեռ աշնանն էի ասում, որ խաղողի մթերման գործընթացն ական է, որն ավելի ուշ սկսելու է գործել,- ասում է նա` կանխատեսելով, որ հիմնական պայթյունը սպասվում է օգոստոսին,- լուրջ պայթյուն է լինելու, եթե կառավարությունը միջոցներ ձեռք չառավ։ Դա հենց իրեն հոգեհարազատ գյուղերն են, Քաղցրաշենն է։ Ու հիմա եթե արտաշատցիք այդ գումարը ստացան, արարատցիք, հոկտեմբերյանցիք չստացան, պատկերացնո՞ւմ եք, ինչ են անելու։ Նրանք սրանց են սպասում»։
Նախարարությունում, սակայն, վստահեցնում են, որ մյուս տարածքների գյուղացիներն էլ չեն անտեսվի։ Մյուս գյուղերի համար ևս կազմված են ժամանակացույցներ և պայմանագրեր` գյուղացիների ու մթերող գործարանների միջև, որոնցով էլ կատարվելու են վճարումները։
Ստեղծված պայթյունավտանգ իրավիճակի համար Հրաչ Բերբերյանը մեղադրում է կառավարությանը` նշելով, որ դա կառավարության սխալ աշխատանքի հետևանքն է, որը միջնորդի դեր է ստանձնել մթերող գործարանների ու գյուղացիների միջև։
«Կառավարությունը հո մթերող կազմակերպություն չէ՞։ Կառավարությունը գործարանին պիտի ասեր` տղա ջա՛ն, արի՛ այստեղ, որ գերշահույթով աշխատում ես, գյուղացու գումարն ինչո՞ւ չես տալիս,- ասում է Հրաչ Բերբերյանն ու ավելացնում,- խիզախություն չունի, որ հարցնի, իրենք իրենց հո չեն հարցնելու»։
Իսկ այն, որ հայաստանյան գինու գործարանները գերշահույթով են աշխատում, Հրաչ Բերբերյանը վստահ է։
«Գործարաններում հարկավոր էր լավ ուսումնասիրություն անել, որը չի արվում, ուղղակի ցանկություն չունեն անելու, թե ինչպես է 1 դոլարանոց գինին դառնում 5 դոլար»,- ասում է նա։
Ի դեպ, այս տարի խաղաղի բերքը, թերևս, նախորդ տարվա նման շատ չի լինի, ու կառավարությունը կազատվի մթերման ամենամյա գլխացավանքից։
Գյուղատնտեսության նախարարությունում վերջին օրերի կարկուտների վնասները դեռ չեն հաշվարկել, բայց նշում են, որ ամենամեծ վնասը հասցվել է Արմավիրի մարզում, թեև կարկուտ է տեղացել նաև երևանամերձ Ջրվեժ, Քանաքեռավան, Չարբախ համայնքներում, ավելի թույլ կարկուտ է գրանցվել նաև Գավառում։
