ԵՐԵՎԱՆ, 6 հունիսի — Sputnik. Հայաստանի և Ռուսաստանի միջև ՀՕՊ միացյալ համակարգի ստեղծումն այս պահին համակարգի ուժեղացման միակ միջոցն է, լրագրողներին ասաց Դաշնակցություն խմբակցության ղեկավար Արմեն Ռուստամյանը։
«Եթե դու ավելի լավ համակարգ չունես, պետք է ուժեղացնես ունեցածը։ Նրանք, ովքեր դեմ են, լավագույն տարբերակ չեն առաջարկում։ Մենք այսօր այլընտրանք չունենք, քան այն, ինչ ձեռքի տակ կա»,- ասաց Ռուստամյանը։
Նրա խոսքով` համատեղ ՀՕՊ-ը ենթադրում է տարածաշրջանային մակարդակում անվտանգության հարցերի լուծում։
«Կա նաև Թուրքիան, որը մեր քթի տակ դասավորվում է, սպառնալիք է մեզ համար, երրորդ՝ դաշտային թուրքական բանակը Նախիջևանի տարածքում է տեղակայված ու ի՞նչ անենք՝ եղածը զրոյացնե՞նք… Այդ հայտարարությունները պետք է տրամաբանված լինեն, անհետևանք հայտարարություններ անելը մեր շահերից չի բխում»,- նշեց նա:
Նրա խոսքով` ՀՕՊ համակարգն ուղղված է ՀԱՊԿ բոլոր անդամների պաշտպանությանը և «եթե հնարավորություն կա կանխել նման վտանգը Հայաստանի օգնությամբ, ապա այդպես էլ պետք է լինի»։ Նույնը պետք է վերաբերի նաև մյուս անդամներին։
Նա նշեց, որ համաձայնությունը ստորագրվել է Սիրիայի իրադարձությունների հետ կապված։
«Ռուսաստանի և Թուրքիայի միջև լարվածություն է եղել, ինչը կարող էր Հայաստանի նկատմամբ որոշակի ոտնձգության վերածվել»,- ասաց Ռուստամյանը` օրինակ բերելով երկրի տարածք թուրքական ինքնաթիռների ներխուժումը։
Ավելի վաղ Հայաստանի պաշտպանության փոխնախարար Արա Նազարյանը հայտնել էր, որ համաձայնագրի նպատակը կովկասյան տարածաշրջանում ՀՕՊ համակարգի կատարելագործումն է։
Նրա խոսքով` ՀՕՊ միացյալ համակարգում ներառված զորքերի ընդհանուր կառավարումը կտնօրինի Ռուսաստանը, իսկ ՀՕՊ առանձին համակարգերը կվերահսկվեն Հայաստանի ռազմական ղեկավարության կողմից։
