ԵՐԵՎԱՆ, 4 հունիսի — Sutnik. Արմենուհի Մխոյան. Շիրակի մարզի Անիի տարածաշրջանի Շիրակավան գյուղը երկար տարիներ եկեղեցի չուներ: Համայնքի բնակիչները մոմեր էին վառում և աղոթում գյուղի մատուռներում: Բայց այնպես չէ, որ բնակության առաջին իսկ օրից հայ գյուղացին այս հողի վրա եկեղեցի չի կառուցել. գյուղը եկեղեցի ունեցել է մինչև Ախուրյանի ջրամբարի կառուցումը, որի պատճառով 1820 թվականին գյուղը տեղափոխվեց, բնակիչները վերաբնակեցվեցին: Ջրամբարը կառուցվեց, և 17-րդ դարի եկեղեցին հայտնվեց ջրի տակ: Ասում են, որ երկար տարիներ ջրամբարի տակից եկեղեցու քարերը լույս են տվել:
Շիրակավանցիները պատմում են, որ Ախուրյանի ջրամբարը երբ կառուցեցին, գյուղը տեղափոխեցին, եկեղեցին միայնակ մնաց տարածքում, ասես լացող եկեղեցի լիներ՝ առանց աղոթքի, հետո էլ ջրամբարի ջուրը ծածկեց տաճարը:
«Մի օր էլ սահմանապահները եկան` թե ջրի տակից լույս է արձակվում: Գյուղից շատերս գնացինք տեսանք. ասես իրական հրաշք լիներ` ջրի տակից վառ լույս էր արձակվում, հենց նույն տեղից, որտեղ եկեղեցու խորանն էր: Հետագայում եկեղեցու բոլոր քարերը մեկ առ մեկ դուրս բերվեցին եկեղեցի կառուցելու նպատակով, ու այդ նպատակը երկար ժամանակ անակատար էր»,-պատմում են շիրակավանցիները:
Հենց այդ քարերն են այժմ օգտագործվել` եկեղեցի կառուցելու համար։
Մոսկվայում բնակվող Թավրիզյան եղբայրները գյուղում եկեղեցի կառուցելն իրենց առաքելությունն են համարել երկար տարիներ. իրենց Մարիամ մայրը, ով հիմա կենդանի չէ, երկար տարիներ անկողնային հիվանդ է եղել: Եկեղեցին էլ եղբայրնեը կառուցել են իրենց ծնողների ու հատկապես բարեպաշտ ու հավատացյալ մոր՝ գյուղում եկեղեցի ունենալու երազանքն ի կատար ածելու նպատակով: Շատ արագ` մեկ տարվա ընթացքում շինարարությունն ավարտվեց. անցյալ տարի նույն օրը թեմակալ առաջնորդի ձեռամբ եկեղեցու հիմնարկեքն էր:
Շիրակավանի Սուրբ Աստվածածին եկեղեցին ունի նույն տեսքը, ինչ 17-րդ դարի եկեղեցին, միակ տարբերությունը չափերն են. ներկայիս եկեղեցին մի քիչ փոքր է, բայց հավատացյալ շիարակավանցին վստահ է՝ հոգևոր զորությունն այսօր ավելի ուժեղ է լինելու, իսկ նորակառույց եկեղեցու զանգերն ավելի ուժգին են խփելու, որպեսզի խլացնեն սահմանից այն կողմ հնչող նամազի ձայները:
Սահմանամերձ Շիրակավանն այսօր հանգիստ է՝ ջրից լույս արձակող եկեղեցին երկրոդ կյանք է ստացել, տաճարն արդեն աղոթքով է շնչում, բայց հրաշք Աստվածածինն ավելի զորեղ կլինի, եթե շիրակավանցին միշտ հավատքով մտնի ու իր աղոթքն առ Աստված հնչեցնի:
«Հրճվանքի պահ ենք ապրում այս պատմական իրադարձության ժամանակ: Ամեն գյուղի կյանքում ամենանշանակալից իրադարձությունն է եկեղեցի կառուցելը, քանի որ ինչպես մարդը եթե հոգի չունի, անկենդան է, այնպես էլ յուրաքանչյուր համայնք եթե եկեղեցի չունի, կարող է կենդանության նշաններ ցույց տալ, բայց հոգու նշաններ ցույց չի տալիս: Այս գյուղն այսօր հոգի ունեցավ, ստացավ հոգևոր գոյություն»,- նշեց Շիրակի թեմի առաջնորդ Միքայել եպիսկոպոս Աջապահյանը։
Նա պատգամեց շիրակավանցիներին միշտ եկեղեցի հաճախել, բարի կամք ունենալ ու աղոթք բարձրացնել առ Աստված:
Հունիսի 4-ին Շիրակավան համայնքում` ձեռամբ Շիրակի թեմի առաջնորդ Միքայել եպիսկոպոս Աջապահյանի, նախ դռնբացեք կատարվեց, ապա օծվեցին նորակառույց եկեղեցու 4 սյունները, մկրտության ավազանն ու սուրբ սեղանը: «Սուրբ Աստվածածին» եկեղեցում այսուհետ աղոթք կհնչի, մկրտության ու սուրբ պսակի արարողություն կկատարվի:
