ԵՐԵՎԱՆ, 3 հունիսի- Sputnik. Սխալների և հանցագործությունների ընդունումը կարող է կանխել ցեղասպանության կրկնությունը աշխարհում, հայտարարեց Հայաստանի Ազգային ժողովի նախագահի տեղակալ Հերմինե Նաղդալյանը։
«Եթե մենք իսկապես ցանկանում ենք, որ ոչ մի երկրում ցեղասպանություններ չլինեն, ապա պետք է բոլորս` քաղաքական ուժերը, քաղաքական գործիչները, պետություններն այնքան քաղաքական կամք ու արիություն ունենանք, որպեսզի ուղիղ նայենք պատմությանը և ճանաչենք սխալները և մութ կետերը»,- լրագրողներին ասաց Նաղդալյանը։
Նա նշեց, որ Հայաստանը ցեղասպանության դեմ պայքարի առաջամարտիկ է դարձել։
«100 տարվա ընթացքում բազմաթիվ անգամ են կրկնվել այդ հանցագործությունները։ Եթե առաջին հանցագործությունը ժամանակին պատժվեր և ընդունվեր, ապա իհարկե դա կնպաստեր, որ դրանք չկրկնվեին»,- վստահեցրել է նա։
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների` 1915թ.-ին իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
