ԵՐԵՎԱՆ, 3 հունիսի- Sputnik. Հայաստանի պաշտպանության փոխնախարար Արա Նազարյանի խոսքով` համաձայնագրի նպատակը կովկասյան տարածաշրջանում ՀՕՊ համակարգի կատարելագործումն է։
ՀՕՊ միավորված համակարգի մեջ մտնող զորքերի ընդհանուր կառավարումը կգտնվի Ռուսաստանի իրավասության ներքո, իսկ ՀՕՊ առանձին համակարգերը կվերահսկի Հայաստանի ռազմական ղեկավարությունը։
«Խաղաղ ժամանակ կողմերն իրենք կարող են որոշում ընդունել իրենց ենթակայության տակ գտնվող զորքերն օգտագործելու մասին։ Այդ որոշումների և գործողությունների մասին կողմերը պետք է ծանուցեն միմյանց»,- ասաց Նազարյանը։
Պատասխանելով պատգամավորների հարցերին` նա նշեց, որ տվյալ համաձայնագրով հայկական ՀՕՊ գործողությունները և զարգացումը չեն սահմանափակվի։
«Մենք ենք մեր խնդիրները լուծողը և որևիցե երկրի վրա հույս չենք դնում, որ գան մեր հարցերը լուծեն: Քաղաքականության մեջ չկան մշտական բարեկամներ և շահեր: Նայեք քաղաքական շահի տեսանկյունից»,- ասաց Նազարյանը։
Հայաստանի և Ռուսաստանի պաշտպանության նախարարներ Սեյրան Օհանյանը և Սերգեյ Շոյգուն Հավաքական անվտանգության կովկասյան տարածաշրջանում միավորված տարածաշրջանային համակարգ ստեղծելու մասին համաձայնագիրը ստորագրել են 2015թ.-ի դեկտեմբերին։
