ԵՐԵՎԱՆ, 3 հունիսի — Sputnik. Թուրքիայի իրավապահ մարմինները շրջափակել են Ստամբուլում Գերմանիայի գլխավոր հյուպատոսության շենքը, քանի որ մարդիկ բողոքի ցույց են կազմակերպել և դժգոհություն են հայտնում 1915 թվականին Օսմանյան կայսրությունում իրականացված Հայոց ցեղասպանության ճանաչման մասին բանաձևի վերաբերյալ, որն ընդունել է Գերմանիայի Բունդեսթագը, հայտնում է ՌԻԱ Նովոստին` հղում անելով Deutsche Welle պարբերականին։
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին ։ «Հայերի և մյուս քրիստոնյա փոքրամասնությունների` 1915թ.-ին իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
Ինչպես հայտնում է պարբերականը, տասնյակ մարդիկ բողոքի ցույց են անցկացրել Ստամբուլում գտնվող հյուպատոսության շենքի մոտ։ Գլխավոր հյուպատոսություն տանող ճանապարհը փակ է, ճանապարհին ջրցան մեքենաներ են տեղադրվել։
Անկարայում բողոքի ցույցեր չեն կազմակերպվել։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
