ԵՐԵՎԱՆ, 3 հունիսի — Sputnik. Բունդեսթագի ընդունած բանաձևը շրջադարձային կլինի Հայոց ցեղասպանության միջազգային ճանաչման գործընթացում, ասաց պատմական գիտությունների դոկտոր, Երևանի պետական համալսարանի պրոֆեսոր Աշոտ Հայրունին։
Նրա խոսքով` բանաձևի տեքստը բարդ սահմանումներ և որոշակի անճշտություններ ունի, սակայն այս բանաձևը շրջադարձային է Ցեղասպանության ճանաչման գործընթացում։
«Այն թուրք հասարակության վրա ավելի ուժեղ կազդի, քան ճանաչումն այլ երկրների կողմից, ովքեր ներկայանում են որպես Թուրքիայի պատմական թշնամիներ։ Այս անգամ բանաձևն ընդունվել է Արևմուտքում Թուրքիայի գլխավոր գործընկերոջ կողմից, մի երկրի կողմից, որը Առաջին համաշխարհային պատերազմի տարիներին նրա գլխավոր դաշնակիցն էր։ Այնպես որ այս ճանաչումը թուրք հասարակության մոտ մի շարք հարցեր կառաջացնի», — ասաց Հայրունին։
Նա նշեց, որ թուրքական արձագանքը ոչ մի նոր բան չէր ասում, նրանք միշտ էլ ցավագին են ընկալել և արձագանքել, նույնն էլ հիմա է կատարվում։ Սակայն փորձագետը համոզված է, որ երկկողմ հարաբերությունները լուրջ փոփոխությունների չեն ենթարկվի։
Նրա խոսքով` Թուրքիան փորձել է Արևմուտքի հետ հարաբերությունների վատթարացման պարագայում բարելավել հարաբերությունները Ռուսաստանի հետ, սակայն դա չհաջողվեց անել։ Մյուս կողմից, նրա խոսքով, Գերմանիան` Ցեղասպանության մեջ իր պատասխանատվության բաժինն ընդունելով, իր վրա է վերցնում հայ-թուրքական հարաբերությունների կարգավորման հարցում լուծումներ գտնելու պարտավորությունները։ Գերմանիան հայտարարության մեջ նշում է, որ հայ-թուրքական հարաբերությունների բարելավումը կարևոր դեր է խաղում մի տարածաշրջանում, որտեղ կարևոր է Թուրքիայի կողմից պատմական փաստերի ընդունումը։
«Այս բանաձևը թույլ կտա առաջ տանել Ցեղասպանության ճանաչման և մարդու իրավունքների պաշտպանության գործընթացը։ Բունդեսթագը կոչ է արել Թուրքիայում պահպանել փոքրամասնությունների մշակութային ժառանգությունը` դասագրքերում ներառելով տեղեկատվություն պատմական ճշմարտության մասին», — ասաց Հայրունին։
Ինչ վերաբերում է փոխհատուցմանը, ապա, փորձագետի խոսքով, այդ մասին խոսելը դեռ վաղ է, սակայն հավանական է, որ մոտ ապագայում կբարձրացվի նաև այդ հարցը։
Բունդեսթագի պատգամավորները հունիսի 2-ին ընդունեցին Հայոց ցեղասպանության վերաբերյալ բանաձևը։ Փաստաթղթին, որն ունի «1915 թ. հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին» անվանումը, կողմ է քվեարկել խորհրդարանականների գերակշիռ մեծամասնությունը, եղել է միայն մեկ ձեռնպահ և մեկ դեմ ձայն:
