ԵՐԵՎԱՆ, 2 հունիսի — Sputnik. «Բացահայտենք Երևանը. հայացք քաղաքի անցյալին և ներկային» էլեկտրոնային գրքի շնորհիվ արևոտ Երևանն ավելի հասանելի կդառնա հայկական մայրաքաղաք այցելել ցանկացող օտարերկրացիների համար։ Այս մասին ասաց Հայ բարեգործական ընդհանուր միության (AGBU) կենտրոնական վարչական խորհրդի անդամ, Հայկական վիրտուալ համալսարանի նախագահ Երվանդ Զորյանը։
Երևանի քաղաքապետարանն ու Հայկական բարեգործական ընդհանուր միության Հայկական վիրտուալ համալսարանը ներկայացրեցին «Բացահայտենք Երևանը. հայացք քաղաքի անցյալին և ներկային» նոր զբոսաշրջային էլեկտրոնային գիրքը։
Զորյանի խոսքով` ժամանակակից և տեղեկատվական գիրքը մուլտիմեդիոն ձևաչափով է արված, քանի որ այն հասանելի է մի քանի լեզվով, այն կարելի է տեղադրել ժամանակակից բոլոր գաջեթների վրա, ինչպես նաև դիտել համակարգչով։
«Գրքում կան լուսանկարներ, հետաքրքիր տեսանյութ, սլայդներ, աուդիոֆայլեր, ինտերակտիվ քարտեզ, քաղաքի եռաչափ պատկերներ։ Հավելվածի օգնությամբ կարելի է տեղեկանալ Երևանի վերջին նորություններին», — ասաց Զորյանը։
Նա ավելացրեց, որ էլեկտրոնային գիրքը հնարավորություն է տալիս այնքան մանրակրկիտ ուսումնասիրել քաղաքը, որ մայրաքաղաքով և նրա շրջակայքով ճանապարհորդելն ու տեսարժան վայրեր այցելելն ավելի հեշտ կլինի։
Շնորհանդեսը ցույց տվեց, որ գիրքը բացահայտում է ոչ միայն երևանցիների, այլև ճանապարհորդողների համար։ Սա Երևանն ուսումնասիրելու հրաշալի հնարավորություն է, նույնիսկ եթե զբոսաշրջիկը մեկ օր է Երևանում լինելու։
Էլեկտրոնային գիրքը կօգնի նաև նրանց, ովքեր ցանկանում են արդյունավետ և խելացի կերպով իրենց ժամանակն անցկացնել Երևանում։
Գիրքը մուլտիմեդիոն հարթակի արդեն երկրորդ ինտերակտիվ հավելվածն է։ Այն հնարավորություն կտա ընթերցողին Երևանի մասին տեղեկություն ստանալ միանգամից յոթ լեզվով։ Էլեկտրոնային գրքում 6 էքսկուրսիայի և քաղաքում զբոսնելու մեկօրյա փաթեթ է առաջարկվում, ինչը գիրքը դարձնում է կատարյալ զբոսաշրջային ինտերակտիվ ուղեցույց։
