ԵՐԵՎԱՆ, 2 հունիսի — Sputnik. ՀՀ էկոնոմիկայի նախարար Արծվիկ Մինասյանը լրագրողների հետ հանդիպմանը պարզաբանեց օրեր առաջ իր արած հայտարարությունը, որն, ըստ նրա, աղավաղվել ու խեղաթյուրվել էր։
«Ես ասել եմ հետևյալը, որ շաքարավազի գործարանը Հայաստանում միակն է, այս պահին երկրորդ գործարան չկա: Բայց գործող օրենքի շրջանակում այս գործարանը իր գործունեությամբ չի համարվում մենաշնորհ: Որպեսզի իրականությունն ու օրենքը իրար համապատասխանեն, անհրաժեշտ է, որպեսզի մենաշնորհի կարգավիճակ ստանա, բայց ոչ թե արտոնությունների համար, այլ` հավելյալ պարտավորությունների։ Քանի որ երբ կազմակերպությունը չի համարվում մենաշնորհ, նրա նկատմամբ չես կարող կիրառել հակամենաշնորհային գործիքներ»,- պարզաբանեց նախարարը։
Նա հավելեց. «Ամենևին չեմ ասել, որ իրեն պետք է օրենքով ճանաչել մենաշնորհ, ես նման ընկալում բացարձակ չունեմ»:
Իսկ թե ինչու է ինքը հատկապես շաքարավազի մասին խոսել, Արծվիկ Մինասյանը նշեց, որ պարզապես օրինակ է բերել է շաքարավազը։
«Ենթադրություններ անել, թե իբր բնական մենաշնորհ ենք ուզում տալ, կամ այդպիսի հարց է քննարկվում կառավարությունում, պարզապես իրականությանը չհամապատասխանող հայտարարություններ են»,- ասաց նախարարը։
Ի դեպ, Մինասյանի այս հարցազրույցը լայնորեն քննարկվեց նաև քաղաքական ու տնտեսագիտական շրջանակներում` հիմնականում քննադատության արժանանալով, ուստի նա նաև իրեն քննադատող գործընկերներին դիմեց` ասելով.
«Ես նույն Արծվիկ Մինասյանն եմ, ինչպիսին որ պառլամենտում էի, այդպես էլ այստեղ: Ես իմ համոզմունքները չեմ փոխել և չեմ փոխելու, քանի որ ես այստեղ նշանակված եմ ՀՅԴ-ի առաջադրմամբ, հետևաբար բոլոր այն հայացքները, մոտեցումները, որոնք առաջ է տանում քաղաքական ուժը, ես շարունակում եմ որպես նախարար առաջ տանել»։
Ինչ վերաբերում է վարչապետի հանձնարարականներին, Արծվիկ Մինասյանը խորհուրդ տվեց սպասել վերջնական զեկույցին։ Իսկ թե դրանում որքանով կարտացոլվեն այս կամ այն ապրանքային շուկայում մենաշնորհային դիրք զբաղեցնող գործարարների անունները, նախարարն այս պահին չցանկացավ ասել, բայց նշեց, որ հրապարակված 10 ապրանքատեսակներն առանձնացվել են` ելնելով դրանց սոցիալական նշանակությունից։
Հիշեցնենք, որ ՀՀ վարչապետը հինգշաբթի կառավարության նիստում հայտարարեց, որ շաքարավազի, ալյուրի, ցորենի, ձեթի, բրնձի, հնդկաձավարի, կարագի, մարգարինի, բանանի, նարնջի, մանկական սննդի, թռչնի մսի, դեղորայքի, բենզինի և դիզելային վառելիքի շուկաները, նրա խոսքով, ֆորմալ առումով մենաշնորհային չեն, սակայն հանրության կողմից այդպես են ընկալվում։
