ԵՐԵՎԱՆ, 2 հունիսի — Sputnik. Թուրքիայի ԱԳՆ-ն հետ է կանչել ԳԴՀ գործերի ժամանակավոր հավատարմատարին Բունդեսթագի կողմից 1915 թվականին Օսմանյան կայսրությունում Հայոց ցեղասպանության ճանաչման մասին բանաձևի ընդունման պատճառով, հայտնում է ՌԻԱ Նովոստին` հղում անելով Ռոյթերս գործակալությանը, որն էլ իր հերթին հղում է անում թուրքական դիվանագիտական աղբյուրին։
Բունդեսթագի պատգամավորները հունիսի 2-ին ընդունեցին Հայոց ցեղասպանության վերաբերյալ բանաձևը։ Փաստաթղթին, որն ունի «1915 թ. հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին» անվանումը, կողմ է քվեարկել խորհրդարանականների գերակշիռ մեծամասնությունը, եղել է միայն մեկ ձեռնպահ և մեկ դեմ ձայն:
Ավելի վաղ Անկարան հայտարարել էր խորհրդակցության համար ԳԴՀ-ից իր դեսպանին հետ կանչելու մասին, Անկարայում Գերմանիայի դեսպանը նույնպես կանչվել է Թուրքիայի ԱԳՆ։ Թուրքիայի նախագահ Ռեջեփ Թայիպ Էրդողանը հայտնել է այն մասին, որ Բունդեսթագի որոշումը լուրջ հետևանքներ կունենա թուրք-գերմանական հարաբերությունների վրա։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
