ԵՐԵՎԱՆ, 2 հունիսի — Sputnik. Եվրոպական ներդրումային բանկի ու Եվրոպական ներդրումային հիմնադրամի ներկայացուցիչները հինգշաբթի Երևանում կայացած քննարկմանը հայտարարեցին, որ պատրաստ են ֆինանսավորել հայ գործարարների նորարարական գաղափարները այն բանից հետո, երբ Հայաստանը մայիսի 19-ին ստորագրած պայմանագրով միացավ «Հորիզոն 2020» եվրոպական ծրագրին։
Ինչպես նշեց ՀՀ փոխվարչապետ Վաչե Գաբրիելյանը, այս ծրագիրը ոչ թե անմիջական ներդրում է ենթադրում, այլ ֆինանսական անսպառ հնարավորություններ և դրանից օգտվելու միջոցներ։
«Պատկերացրեք` մեծ ավազան, որից օգտվելու շատ լայն հնարավորություններ ունենք»,- ասաց նա։
Փոխվարչապետը նաև նշեց, որ ֆինանսավորվելու են գիտահեն ոլորտները` տեղեկատվական տեխնոլոգիաները, մեքենաշինությունը, բայց պարտադիր պայմանը նորարարությունն է։
Փոխվարչապետը համոզված է, որ նման ծրագրերի պակաս Հայաստանում չի լինի։
«Եթե դուք հայ ժողովրդի տաղանդին կասկածում եք, ես կասկած չունեմ»,- ասաց Վաչե Գաբրիելյանը լրագրողների հետ զրույցում։
Հայ ժողովրդի ստեղծարար տաղանդին չի կասկածում նաև ԵՄ Երևանյան պատվիրակության ներկայացուցիչ, դեսպան Պյոտր Սվիտալսկին, ով իր ելույթում նշեց, որ համոզված է` հայ գործարարները գաղափարների պակաս չունեն, բայց ունեն դրանք կյանքի կոչելու ֆինանսական խնդիր։
«Գաղտնիք չէ, որ շատ տաղանդավոր հայերի համար մեծագույն խոչընդոտը ֆինանսներ հայթայթելն է, վարկեր վերցնելը, և ես շատ ուրախ եմ, որ Եվրոպական ներդրումային բանկը Հայաստանին մեծ ուշադրություն է դարձնում, պարբերաբար այցելում են պատվիրակություններ լավ գաղափարներով»,- ասաց դեսպանը։
ԵՆԲ ներկայացուցիչը Sputnik Արմենիայի հարցին ի պատասխան հայտնեց, որ 2010 թ.-ից մինչ օրս Հայաստանում շուրջ 270 մլն եվրոյի ներդրում է իրականացվել։ Այս ցուցանիշով Հայաստանը տարածաշրջանի երկրների շարքում 4-րդն է։
