ԵՐԵՎԱՆ, 2 հունիսի — Sputnik. «Տաշիր» առևտրի կենտրոնում գրանցված հրդեհը եղել է միայն մեկ հարկում, հայտնում է Sputnik Արմենիայի թղթակիցը դեպքի վայրից։
Նրա խոսքով` ներկա պահին ուժեղ այրվածի հոտ է գալիս։
«Ժամը 15:05-ին ԱԻՆ առաջին բրիգադն է ժամանել։ Այժմ դժվար է գնահատել հրդեհի աստիճանը», — ասաց ԱԻՆ փրկարարական ծառայության մայոր Դավիթ Գրիգորյանը։
Հրդեհը տեղի է ունեցել հոսանքի վահանակի բռնկման պատճառով։ Ինչ վերաբերում է վնասի չափին, հայտնի է, որ տուժածներ և կորուստներ չկան։
Բազմաթիվ քաղաքացիներ են հավաքվել «Տաշիր» առևտրի կենտրոնում` իմանալու, թե ինչ է տեղի ունեցել առևտրի կենտրոնում։
Sputnik Արմենիայի թղթակցին հաջողվել է ներս մտնել, սակայն ավելի ուշ հրշեջները բոլորին առևտրի կենտրոնից դուրս հրավիրեցին։ Ամբողջ շենքում ուժեղ այրվածի հոտ է գալիս, շնչելն անհնար է։ Խանութի աշխատակիցներից մեկը հայտնեց, որ հրդեհը բռնկվել է հինգերորդ հարկում սանհանգույցի և բեռնատար վերելակի կողքին։
«Վերջերս այնտեղ վերանորոգում էին իրականացնում։ Միգուցե դա ինչ-որ կերպ կապ ունի հրդեհի հետ», — հայտնեց աղբյուրը` չցանկանալով ներկայանալ։
Խանութի աշխատակիցների խոսքով` ծուխն այնքան շատ էր, որ աշխատակիցներն արագ լքել են տարածքը` չհասցնելով վերցնել իրերը։ Ականատեսների խոսքով` առևտրի կենտրոնի հոսանքը որոշ ժամանակով անջատված էր, սակայն ներկա պահին այն վերականգնվել է։ Աշխատակիցներին թույլ տվեցին վերցնել իրերն ու շուտ լքել խանութի տարածքը։
Առևտրի կենտրոնի ղեկավարությունը չի ցանկանում պատասխանել հարցերին, սակայն վստահեցնում է, որ կպատասխանի ավելի ուշ։ Մարդիկ սկսեցին ցրվել։
«Եթե ծխի հոտը չլիներ, մենք չէինք նկատի, որ հրդեհ է եղել», — ասաց վաճառողներից մեկը։
Sputnik Արմենիայի թղթակիցը հետևում է դեպքերի զարգացմանը։
