ԵՐԵՎԱՆ, 1 հունիսի- Sputnik. «Հարավկովկասյան երկաթուղի» ՓԲԸ-ի տեխնիկական հագեցվածությունը կարող է օգտագործվել Վրաստանի երկաթուղու վերանորոգման համար, լրագրողներին ասաց ՀԿԵ-ի շարժակազմի տնօրինության պետ Նիկոլայ Լավրենչուկը։
ՀԿԵ-ն ձգտում է, որ ջերմաքարշների, վագոնների և անիվների վերականգնման հետ կապված վերանորոգման աշխատանքներն անցկացվեն Հայաստանում, ինչը թույլ կտա նվազեցնել ծախսերը, ինչպես նաև ժամանակին ապահովել տեխնիկայի սպասարկումը։ Գյումրի քաղաքում հավաքված սարքավորման մի մասը յուրահատուկ է Հարավային Կովկասի համար։
Նրա խոսքով` Գյումրիում դեպոյի հնարավորությունները ներկայացվել են Վրաստանում, և հիմա քննարկվում է համագործակցություն հաստատելու հնարավորությունը` Հայաստանում հզորությունների օգտագործման համար։
«Գյումրու դեպոն յուրացրել է էլեկտրաքարշերի վերանորոգումը, առաջին էլեկտրաքարշը թողարկվել է 2014թ.-ի դեկտեմբերին։ Այն մինչև հիմա աշխատում է առանց խափանումների, հիանալի վիճակում է։ Այսօր արդեն թողարկվել է 5-րդ լոկոմոտիվը։ Պարբերաբար վերանորոգվող բոլոր լոկոմոտիվները փորձարկումներ են անցնում»,- լրագրողներին ասաց Լավրենչուկը։
Ի տարբերություն Ռուսաստանի, որտեղ վերանորոգումը տևում է 2 շաբաթ, Հայաստանում լոկոմոտիվները վերանորոգվում են մեկ ամսվա ընթացքում։ Լավրենչուկի խոսքով`ամեն ինչ արվում է, որ վերանորոգման աշխատանքները որակյալ լինեն։
Նախկինում էլեկտրաքարշերը Հայաստանում չէին վերանորոգվում, դրանք ուղարկվում էին Ռուսաստան կամ Վրաստան։ ՏՊ-3 ցիկլի ջերմաքարշերի վերանորոգումը Ռուսաստանում արժի 4,5 մլն ռուբլի, իսկ Հայաստանում` 5,5 մլն դրամ (շուրջ 1 մլն ռուբլի)` առանց հաշվի առնելու տեղափոխման ծախսերը։ Բացի այդ, Հայաստանում ջերմաքարշերի վերանորոգումը թույլ է տալիս 56 աշխատատեղ։
2014թ.-ի դեկտեմբերին Գյումրու դեպոյի տարածքում սկսել են վերանորոգել նաև քարշային շարժիչները։ Արդեն ավելի քան 40 սարք է վերանորոգվել։ Վերանորոգումն իրականացվում է գործարանային չափանիշներին համապատասխան, և մինչև հիմա դրանց հետ խնդիրներ չեն եղել։
Ապրիլին ՀԿԵ վերանորոգողներին են դիմել ԲելԱԶ-ների շարժիչները վերանորոգելու խնդրանքով։ Առաջին շարժիչը վերանորոգվել և տեղադրվել է ԲելԱԶ-ի վրա, ոչ մի խնդիր չկա։ Ապագայում հնարավոր է` երկարաժամկետ պայմանագիր կնքվի։ Նման բանակցություններ են ընթանում Երևանի մետրոպոլիտենի հետ, լիովին հնարավոր է, որ մետրոյի շարժակազմերը նույնպես վերանորոգվեն ՀԿԵ-ի ուժերով։
ՀԿԵ-ի խոշորագույն ենթակառուցվածքային նախագծերից մեկը եղել է Գյումրու երկաթուղային հանգույցի արդիականացումը, որի շրջանակում վերակառուցվել են քաղաքում գտնված լոկոմոտիվային և վագոնավերականգնողական դեպոն, որի բացումը կայացել է 2013թ.-ին։
Ներկա պահին ստեղծվել են անիվների զույգերի, էլեկտրական շարժիչների վերանորոգման և օդային ռեզերվուարների փորձարկման նոր հատվածներ։
«ՀԿԵ» ՓԲԸ-ն «Ռուսական երկաթուղիներ» ԲԲԸ-ի 100% դուստր ընկերությունն է և իրականացնում է «Հայկական երկաթուղիներ» ՓԲԸ-ի կոնցեսիոն կառավարումը: Համաձայն 2008թ.-ի փետրվարի 13-ին Երևանում կնքված պայմանագրի, կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով:
