ԵՐԵՎԱՆ, 1 հունիսի — Sputnik. Նորածինների սեռերի համամասնության առաջին շեղումը մեզ մոտ նկատվել է 1993թ.-ից: Այն իր առավելագույն նիշին է հասել 2000-2001 թթ.-ին, երբ մեր երկրում 100 աղջկա դիմաց ծնվում էր 120 տղա: Այս ցուցանիշների տարբերությունն այսօր ընդհանուր առմամբ նվազել է, բայց հատկապես մարզերում կարծրատիպային մտածելակերպը չի զիջում իր դիրքերը։ Ըստ սահմանվածի`նորման 100 աղջկա դիմաց 106 տղան է։
«Վորդ Վիժն Հայաստանի» «Հոգատարություն հանուն հավասարության» ծրագրի ղեկավար Սևան Պետրոսյանը կարծում է, որ սելեկտիվ աբորտն առաջանում է հասարակության մեջ աղջիկներին չարժևորելու հետևանքով։
«Մեր ծրագրի նպատակն է ստեղծել այնպիսի մի միջավայր, որտեղ աղջիկ և տղա երեխաները կծնվեն ու կարժևորվեն հավասարապես։ Սելեկտիվ աբորտների վերաբերյալ վիճակագրությունը փաստում է, որ Հայաստանը 3-րդ տեղում է` զիջելով Չինաստանին ու Ադրբեջանին»,-ասաց Սևան Պետրոսյանը։
Նրա խոսքով` սելեկտիվ աբորտները կարելի է նաև որպես երեխայի հանդեպ բռնություն բնութագրել։
«Դա ոչ միայն բռնություն է չծնված երեխայի, այլև այդ ընտանիքում արդեն իսկ ծնված այն աղջիկ երեխայի նկատմամբ, որը մեծանում է նման մթնոլորտում»,- ասաց նա։
Միջոցառմանը մասնակից երեխաները ևս իրենց հաստատուն կարծիքն ունեին երևույթի վերաբերյալ։ Մեզ հետ զրույցում Աննա Այվազյանը նշեց, որ աղջիկ-տղա անհավասարությունը սկսվում է բակից։
«Աղջիկն էլ կարող է շախմատ ու ֆուտբոլ խաղալ։ Ինչու՞ ոչ։ Օրինակ` մեր բակում տղաները ֆուտբոլ են խաղում, իսկ երբ աղջիկներով ուզում ենք մտնել խաղի մեջ, մեզ արգելում են, ասում են` դուք աղջիկ եք»։
Ի դեպ, անցկացված հետազոտությունը ցույց է տվել, որ սեռով պայմանավորված հղիության արհեստական ընդհատումներն ամենավառն են արտահայտվում 3-րդ եւ 4-րդ երեխայի դեպքում, բարձրագույն կրթություն, բարձր եկամուտներ ունեցող (100,000 դրամ և ավելի) կանանց շրջանում:
ՄԱԿ-ի բնակչության հիմնադրամն անգամ փորձել է պարզել սելեկտիվ աբորտների պատճառները։ Ըստ հարցման` գերակշռող է եղել այն մտածելակերպը, որ տոհմը շարունակող է պետք։ Հաջորդ պատճառաբանությունը ժառանգորդ լինելու հանգամանքն է։ Հատկանշական է, որ աղջիկ երեխա ունենալու ցանկություն է հայտնել ամեն 7 կնոջից մեկը։
