ԵՐԵՎԱՆ, 1 հունիսի — Sputnik. 2016 թ.-ի մայիսի 30-ին կայացած ռեկտորատի նիստում քննարկվել է ԵՊՀ ռեկտոր Արամ Սիմոնյանի՝ ապրիլյան քառօրյա պատերազմի օրերին զոհված սպաների և ժամկետային զինծառայողների անչափահաս երեխաներին դրամական օգնություն տրամադրելու մասին առաջարկը:
Ինչպես հայտնում է ԵՊՀ-ի մամուլի ծառայությունը, որոշվել է զոհված սպաների, պարտադիր և ժամկետային զինծառայողների անչափահաս երեխաներին յուրաքանչյուր ամիս տրամադրել 40.000 դրամ՝ մինչև չափահաս դառնալը: Ընդհանուր առմամբ՝ հունիսի 1-ից 13 ընտանիքի 29 անչափահաս Մայր բուհի կողմից ֆինանսական աջակցություն կստանա:
ԵՊՀ-ն այս սոցիալական ծրագրի շրջանակում պատրաստակամություն է հայտնել նաև ապրիլյան քառօրյա պատերազմի ժամանակ զոհված զինծառայողների՝ ներկայում պետհամալսարանում ուսանող երեխաներին մինչև ուսումնառության ավարտը տրամադրել ուսման վարձավճարի փոխհատուցում: Զոհված զինծառայողների զավակները, ովքեր կմասնակցեն ԵՊՀ 2016-2017 ուստարվա ընդունելությանը և կհամալրեն համալսարանականների շարքերը, նույնպես կստանան զեղչեր:
Ծրագիրը համակարգող և իրականացնող ԵՊՀ արհեստակցական կազմակերպության նախագահ Արմեն Ավետիսյանը նշեց, որ իրենց աշխատակիցներն արդեն իսկ սկսել են կապ հաստատել ապրիլի սկզբին տեղի ունեցած լայնամասշտաբ ռազմական գործողությունների ժամանակ զոհված զինծառայողների ընտանիքի անդամների հետ:
«Մեր աշխատակիցները ծրագրում ներառված զոհված զինծառայողների ընտանիքի անդամներին հանգամանալից ներկայացնում են ծրագիրը, գումարը ստանալու համար պահանջվող փաստաթղթերը, հաշվեհամարներ ու այլ մանրամասներ»,- նշեց Արմեն Ավետիսյանը և հավելեց, որ հունիս ամսվա ընթացքում բոլոր նրանք, ովքեր կներկայացնեն անհրաժեշտ բոլոր փաստաթղթերը, արդեն իսկ կստանան այս ամսվա համար նախատեսված գումարը:
Սոցիալական ծրագիրը ներառում է ոչ միայն ՀՀ ԶՈՒ-ի, այլև ԼՂՀ-ի պաշտպանության բանակի զոհված զինծառայողների անչափահաս երեխաներին:
