ԵՐԵՎԱՆ, 1 հունիսի — Sputnik. Նարեի համար երկրորդական է իր տոնի անվանումը։ Փոքրիկ գլուխը չի ծանրաբեռնում ավելորդ ինֆորմացիայով ու այն պարզապես Նոր տարի է անվանում։ Գուցե պատճառն այն է, որ այս օրը Ամանորի պես բազում նվերներ է ստանում, ուրախանում և ուշադրության կենտրոնում հայտնվում։ Նարեն ունի երկու երազանք` մեկը գեղեցիկ ու մեծ տիկնիկ ունենալն է, իսկ երկրորդը` ոստիկան դառնալը։
«Ուզում եմ դառնալ ոստիկան, որ պաշտպանեմ բոլոր երեխաներին»,- կարճ ու կոնկրետ ասաց աղջնակը։
Նարեն ու Արաբկիր ԲԿ-ի իր ընկերները փոքրիկ միջոցառում էին կազմակերպել առողջապահության նախարար Արմեն Մուրադյանի համար։ Նախարարին գոհունակությամբ ներկայացրին, որ փոքրիկների լսողության ապարատները բարեհաջող ու վաղ տեղադրելու շնորհիվ դպրոց հաճախելու գործընթացը չի ուշանա։
Այնուհետև Արմեն Մուրադյանն այցելեց վերակենդանացման բաժանմունքում գտնվող փոքրիկներին ու ծանոթացավ նրանց առողջական վիճակին։ Sputnik Արմենիայի հետ զրույցում նախարարը խոստովանեց, որ երեխաների հետ դժվարությամբ է աշխատում, քանի որ դա պահանջում է արհեստավարժության ու հուզականության լուրջ տարանջատում։
«Երբ քո հուզական գերակշռում է, լավ է` այլ բժիշկ զբաղվի տվյալ երեխայով, որ ավելի մեծ նպաստ բերի առողջությանը»,-ասաց Արմեն Մուրադյանը։
Նախարարը բոլոր ծնողներին հորդորեց, որ երեխաների առողջ ապրելակերպն ու առողջ սնունդը բարձր գնահատեն։
«Այսօր պետական ծրագրեր են իրականացվում, մասնավորապես կարող եմ օրինակ բերել 5 սկրինիգային ծրագրերը`լսողության, տեսողության, կոնքազդրային հոդի հետ կապված։ Տարածված է անեմիայի խնդիրը։ Սա կապված է ոչ միայն երեխայի, այլև կերակրող մոր սննդակարգի հետ։ Սա լրջագույն խնդիր է»,-ասաց նախարարը։
Վերջում Արմեն Մուրադյանն ընդգծեց, որ կայուն զարգացման նոր ծրագրեր են մշակվելու մայրական ու մանկական մահացության դեպքերը նվազեցնելու ուղղությամբ։ Իսկ այս պահին Հայաստանն արձագանքել է հազարամյակի մարտահրավերներին, մեր ցուցանիշները համապատասխանում են միջազգային ամենախիստ նորմերին։
