ԵՐԵՎԱՆ, 1 հունիսի — Sputnik. ՀՀ արտգործնախարար Էդվարդ Նալբանդյանը Իրան կատարած այցի շրջանակում մտադիր է Երևանի և Թեհրանի միջև մուտքի արտոնագրի ռեժիմի չեղարկման վերաբերյալ համաձայնագիր ստորագրել, Sputnik Պերիստան լրատվական գործակալությանն է հայտնել ԻԻՀ արտգործնախարարության աղբյուրը։
ՀՀ կառավարությունն առաջիկա նիստում՝ հունիսի 2-ին, հավանություն կտա ՀՀ կառավարության և Իրանի Իսլամական Հանրապետության կառավարության միջև քաղաքացիների՝ առանց մուտքի արտոնագրի այցելությունների մասին համաձայնագրի կնքմանը:
Կառավարության որոշման նախագծի համաձայն` այս համաձայնագրի ստորագրումը բխում է Հայաստանի և Իրանի միջև երկկողմ հարաբերությունները խթանելու, փոխշահավետ տնտեսական, առևտրային և այլ կապերն ամրապնդելու անհրաժեշտությունից:
Երկու պետությունների քաղաքացիների փոխադարձ այցելությունների ռեժիմը սահմանում է, որ երկու պետությունների քաղաքացիները սովորական և դիվանագիտական անձնագրերով առանց մուտքի արտոնագրի կարող են մուտք գործել, տարանցմամբ անցնել, դուրս գալ և գտնվել միմյանց պետությունների տարածքում` առավելագույնը 90 օր ժամկետով` 180 օրվա ընթացքում:
«Վերջին մի քանի ամսվա ընթացքում զգալի առաջընթաց է արձանագրվել Հայաստանի և Իրանի հարաբերություններում։ Այս որոշումը երկար խորհրդակցությունների արդյունք է։ Համաձայնագիրը թույլ կտա իրանցիներին Հայաստան մուտք գործել առանց վիզայի և այնտեղ գտնվել 90 օր, Իրան մեկնող հայերի դեպքում գործելու են նույն կանոնները», — հայտնել է աղբյուրը։
Գործակալության զրուցակիցը նաև հայտնել է, որ Թեհրանը մուտքի արտոնագրի չեղարկման հարցը քննարկում է նաև մի շարք այլ երկրների հետ, այդ թվում` Ռուսաստանի։ «Այդ հարցում մենք զգալի առաջընթաց ունենք», — նշել է նա։
ՀՀ կառավարության որոշման նախագծում նշված է, որ համաձայնագրի ստորագրումը կխթանի նաև երկկողմ զբոսաշրջությունը և առավել նպաստավոր պայմաններ կստեղծի ՀՀ-ի և ԻԻՀ քաղաքացիների փոխադարձ այցելությունների համար:
