ԵՐԵՎԱՆ, 30 մայիսի — Sputnik. Հայաստանի ՊՆ-ն մրցույթ է հայտարարել այն զորակոչիկների համար, ովքեր անհրաժեշտ հմտություններ ունեն կիբերզորքերում ծառայելու համար, հայտնում է պաշտպանական գերատեսչության մամուլի ծառայությունը։
«ՀՀ պաշտպանության նախարարությունը՝ «Հայ տեք» կիբերանվտանգության կենտրոնի հետ համատեղ, պաշտպանական համակարգում բարձր տեխնոլոգիական լուծումների ստեղծման և դրանց արդյունավետ կիրառման, ինչպես նաև զորակոչիկների մասնագիտական կարողությունները պարտադիր զինվորական ծառայության ընթացքում ավելի արդյունավետ օգտագործելու նպատակով, հայտարարում է մրցույթ», — ասված է հաղորդագրության մեջ։
Մրցույթին կարող են մասնակցել 2016թ. ամառային զորակոչի ժամանակ զորակոչի ենթակա և ՏՀՏ և ԲՏ ոլորտներում խորը մասնագիտական գիտելիքներ և համապատասխան խնդիրներ լուծելու պրակտիկ հմտություններ ունեցող զորակոչիկները` հետևյալ մասնագիտություններով. ծրագրավորում, ցանցային ադմինիստրատոր, ցանցեր, կիբերանվտանգություն:
Մրցույթում հաղթած զորակոչիկներն ժամկետային զինվորական ծառայության կնշանակվեն ՀՀ ԶՈՒ կապի և ԱԿՀ վարչության հատուկ ստորաբաժանումներում։
