ԵՐԵՎԱՆ, 30 մայիսի — Sputnik. «Ինտեր ՌԱՕ» ընկերությունը նախատեսում է վաճառել Հայաստանում ունեցած իր ակտիվները մինչև 2017 թվականի վերջ, հայտնում է Rambler News service —ը` հղում անելով ընկերության հեռուստաասուլիսին։
2015 թ. սեպտեմբերի 30-ին «Տաշիր» ընկերությունների խումբը, որը պատկանում է Ռուսաստանում բնակվող հայ միլիարդատեր Սամվել Կարապետյանին, և «Ինտեր ՌԱՕ» ընկերությունը պայմանագիր են ստորագրել՝ Հայաստանի Հանրապետության էլեկտրաէներգետիկ ակտիվների առուվաճառքի վերաբերյալ։ Այսպիսով` «Ինտեր ՌԱՕ» ընկերության մասնաբաժինն այս ընկերություններում նվազել է 100%-ից մինչև 50%։
«Գործարքի երկրորդ մասը նախատեսվում է ավարտել մինչև 2017 թվականի վերջ», — ասվել է ասուլիսի ընթացքում։
Մայիսի 30-ին «Ինտեր ՌԱՕ» ընկերությունը հրապարակել է միջազգային ստանդարտների համապատասխան 2016 թվականի առաջին եռամսյակի միջանկյալ կոնսոլիդացված ֆինանսական հաշվետվությունը, որի համաձայն` ՖՀՄՍ-ով (Ֆինանսական հաշվետվությունների միջազգային ստանդարտները) կազմակերպության զուտ շահույթը կազմել է 16.98 մլրդ ռուբլի` ավելանալով 5.8% 2015 թվականի առաջին եռամսյակի համեմատ։
«Արտասահմանյան ակտիվներ» հատվածում շահույթի զգալի նվազումը 6.3 մլրդ ռուբլով (39,3%) մինչև 9.6 մլրդ ռուբլի առավելապես պայմանավորված է ՀՀ-ում տեղակայված ակտիվների 50% մասնաբաժնի դուրս գալով. դրանց ցուցանիշները չեն մտել «Ինտեր ՌԱՕ» ընկերության 2016 թվականի առաջին եռամսյակի շահույթի մեջ։
«Հայաստանի էլեկտրական ցանցեր» ՓԲԸ-ն «ԻՆՏԵՐ ՌԱՕ ԵԷՍ» ՓԲԸ-ի 100 տոկոսանոց դուստր ընկերությունն է։ Ընկերության հիմնական ուղղությունը էլեկտրաէներգիայի բաշխումն է Հայաստանի սպառողներին, այդ թվում` բնակչությանը։ Ընկերությունը նաև Վրաստան և ԼՂՀ էլեկտրաէներգիայի արտահանման արտոնագիր ունի։
