ԵՐԵՎԱՆ, 30 մայիսի — Sputnik. Թուրքիայի փոխվարչապետ Նուման Կուրլտուլմուշը կարծում է, որ Գերմանիայի խորհրդարանը հայերի պատճառով չի վատացնի թուրք-գերմանական հարաբերությունները։
Բունդեսթագը պատրաստվում է ճանաչել «ցեղասպանություն» եզրույթը և պաշտոնապես դատապարտել Առաջին համաշխարհային պատերազմի ժամանակ Օսմանյան կայսրության կողմից իրականացված զանգվածային սպանությունները։ Քվեարկությունը նախատեսված է հունիսի 2-ին։
«Ոչ ոք չի լսելու խորհրդարանի կարծիքը նման հարցերում։ Չեմ կարծում, որ Գերմանիայի խորհրդարանը կորոշի քանդել թուրք-գերմանական հարաբերությունները, որպեսզի հաճոյանա մի շարք քաղաքագետների», — ասել է Կուրլտուլմուշը։
Նրա խոսքով` խորհրդարանները չպետք է զբաղվեն պատմության քաղաքականացմամբ և պատմական իրադարձությունները չպետք է օգտագործեն «մութ հաշվեհարդարի» նպատակով։
Նրա խոսքով` եթե Բունդեսթագը ճանաչի այս բանաձևը, ապա Անկարայի համար այն «սովորական թղթի կտոր» կլինի։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
