ԵՐԵՎԱՆ, 29 մայիսի- Sputnik. Կիևի մարզում՝ մասնավոր ծերանոցում, հրդեհի հետևանքով մահացել է 17 մարդ, ոստիկանությունը պարզում է հաստատության գործունեության օրինականությունը, «Ուկրաինա 112» հեռուստաալիքի եթերում ասել է Կիևի մարզի ազգային ոստիկանության պետի պաշտոնակատար Դմիտրի Գոլովինը: Այս մասին հայտնում է ՌԻԱ Նովոստին:
«Կասկածյալ անձ է ձերբակալվել, այժմ քննչական-օպերատիվ գործողություններ են իրականացվում, նախատեսվում է լրացուցիչ հետախուզություններ անցկացնել՝ փաստաթղթեը գտնելու նպատակով, որոնք կհաստատեն այդ հաստատության գործունեության օրինականությունը կամ անօրինականությունը»,- ասել է Գոլովինը:
Նրա խոսքով՝ քրեական գործի նախնական իրավական որակավորումն է «հրդեհային անվտանգության նորմերի խախտում», որով 3-8 տարի ազատազրկում է նախատեսվում:
Ուկրաինայի արտակարգ իրավիճակների պետական ծառայության ղեկավար Նիկոլայ Չեչոտկինը հայտնել է, որ փրկվել է 18 մարդ: Մեծ մասին տեղափոխել են Կիևի մարզի Վիշգորոդի շրջանի ծերանոց, երեքին տարել են հարազատները:
Կիևի մարզի Բրովարյան շրջանի Լիտոչկի գյուղի առանձնատներից մեկում, որտեղ տարեց մարդիկ են եղել, հրդեհ է բռնկել շաբաթ լույս կիրակի գիշերը:
Ավելի վաղ տեղեկություն է տարածվել, որ ծերանոցն անօրինական է գործել, հրդեհի պատճառ կարող էր դառնալ հեռուստացույցի պայթյունը: Հարուցվել է քրեական գործ «հրդեհային անվտանգության նորմերի խախտում» հոդվածով:
