ԵՐԵՎԱՆ, 28 մայիսի — Sputnik. Դաշնային ազգային թունաբանական ծրագրով զբաղվող ամերիկացի գիտնականները մշտական էլեկտրամագնիսական ճառագայթման ենթարկված լաբորատոր առնետների մոտ քաղցկեղային ուռուցքներ են հայտնաբերել: Իսկ էլեկտրամագնիսական ճառագայթումը հիմնականում բջջային հեռախոսներից է փոխանցվում:
«Գիտնականները պարզել են, որ էգ առնետների մի մասի սրտում կամ գլխուղեղում (2% մինչև 3%-ի մոտ) հազվագյուտ քաղցկեղային գոյացություններ են առաջանում, երբ նրանց վրա մշտական ճառագայթում է ներգործում», — նշված է Huffington Post թերթի հրապարակման մեջ:
Առնետները փորձության են ենթարկվել երկու տարի շարունակ, շաբաթական 7 օր, օրական 9 ժամ: Հետազոտությունը ցույց է տվել, որ բացասական ազդեցությունն ավելի շատ զգացվել է որձ առնետների մոտ:
Գիտնականները չեն նշում, թե այս արդյուքները որքանով կապ ունեն մարդկանց հետ:
Սննդամթերքի և դեղորայքի սանիտարական վերահսկման վարչությունը 2015 թվականին իր կայքում նյութ էր հրապարակել է, որի համաձայն՝ «ապացույցներ չկան, որ բջջային հեռախոսների օգտագործումը կարող է գլխուղեղի քաղցկեղ առաջացնել»:
Միաժամանակ նոր հետազոտությունները ցույց են տալիս, որ ճառագայթումը կարող է կենսաբանական ազդեցություն ունենալ:
«Արդյո՞ք սա նշանակում է, որ դուք պետք է չօգտվեք բջջային հեռախոսներից: Ո՛չ», — նշել է գիտնական Մայքլ Հանսենը:
Այս կապակցությամբ չնյարդայնանալու համար գիտնականը խորհուրդ է տվել կանխարգելիչ միջոցներ ձեռնարկել՝ նշելով, որ էլեկտրամագնիսական ճառագայթումը զգալիորեն նվազում է հեռավորության վրա: Շփվելու համար կարելի է հրաժարվել ձեռքի սարքերից ու տեսազանգերից: Խորհուրդ է տրվում նաև հեռախոսը չպահել գրպանում կամ կրծքավանդակի հատվածում:
